Chelsea-in Delap an la lut

Chelsea chuan Ipswich Town aṭangin pound maktaduai 30-in Liam Delap an la lut a, kum 22 mi English striker hian kum ruk daih contract a ziak.

Tractor Boys hi Premier League aṭangin an relegate a, Blues hian Delap hi a release clause-in an la chhuak. Chelsea hian pound maktaduai 20 an pe phawt ang.

Delap chuan, "Chelsea dinhmun ka hria a, player-te leh coach te hmasawn zawngin an kal. Hma ka sawn belhchhah theihna tur hmunah ka ngai a, nomawi tam zawk ka chawipui theih ngei ka beisei," tiin a sawi.

Season liam ta khan Delap hian match 37 khelin goal 12 a khung. English striker hi Manchester City academy chhuak a ni a, loan hmangin Stoke, Preston leh Hull tan a khel tawh. Kum 2024 khan Ipswich-in pound maktaduai 20 in a zawm a ni.

Delap hi Republic of Ireland international hlui Rory Delap-a fapa a ni a, England U21 team-ah UEFA U21 C'ship khel turin training a zawm mek. Mahse, Chelsea hian June 14 - July 13, 2025 chhunga khelh tur FIFA Club World Cup-ah an khelh dawn avangin Delap hian U21 Euro hi a khelh a rinawm lo zawk.

Blues hi Premier League-ah palina an ni a, goal khung lamah an harsatna an tawk. Cole Palmer-a'n goal 15 khungin club top scorer a ni a, Nicolas Jackson-a'n league match 30-ah goal 10 khungin Christopher Nkunku phei chuan league match 27-ah goal thum chauh a khung. Rawlthar Marc Guiu-a'n goal a khung lo a, mah se match thum chauh a khel thih hriat a ṭha thung.