EFL Cup Derby-ah chak duh zawk an chak

Thawhlehni zan English Football League Cup (League Cup) last 16-ah Derby pahnih khelh a ni. Manchester United-in an mikhual Manchester City lakah an ṭhat dan bera inremkhawm chungin 1-0 in hnehna an chang a, champion lai an hnawt chhuak.

West Ham coach Slaven Bilic-a'n EFL Cup-a ngaipawimawh tih lantir nan a player ṭha rual remkhawmin London derby a hmachhawn a, player khel khat zawk chhawr chunga khel Chelsea chu 2-1 in an hneh - a khaikhawmna awlsam ber chu derby match hnihah chak duh zawk team pahnihin hnehna an chang tih hi a ni.

Special Juan

Chelsea laka mualpho hlim Uni-ted manager Jose Mourinho-a'n player a luhtir dan aṭangin chak ngei a duh tih a chiang a, hliam vanga inlan thei lo Eric Bailly leh Marouane Fellaini aia Marcos Rojo leh Michael Carrick an lut tih loh chu Portuguese manager hian Premier League-a a chhawr ṭhin player vek a chhawr.

City boss Pep Guardiola-a'n an match hnuhnung bera Southampton draw tu team aṭangin player pakua ngawt a thlak danglam thung a, a chhawr ngai loh player tam zawkin inkhel bul an ṭan. First half-ah team pahnihin goal shot nei lo mah se Spanish manager hian a player ṭha chhawr loh a tuar a, minute 54-naah 'The Special One' enkawlna hnuaia khel Juan Mata chuan a 'special' na pholangin chak mamawh United tan goal a khung.

Guardiola-a'n goal an chhuah hnuah match ruk chhung chak hmel hmuh loh duh lohin Raheem Sterling leh Sergio Aguero tlanluhtir mah se player hlawh hnem pahnih hian danglamna an thlen thei lo a, khel
ṭha zawk, chak duh zawk leh thiam zawk United-in hnehna an chang.

United tan khawvela player manto ber Paul Pogba chuan post a pet per a, Zlatan Ibrahimovic-a'n Paris Saint Germain-a a thiamna angin la khel chhuak lo mah se Mata goal khung tur a siamsak a, City hun neih ṭhat ber chu Nigerian striker Kelechi Iheanacho chuan pen ruk vel lek aṭangin a tauh over bawk.

Pep a chuai?

Barcelona boss hlui Pep-a'n inelna hrang hrangah match ruk chhung chu chak hmel a hmu ta lo - manager a nih hnuah hetianga chak hmel hmuh loh rei hi a la nei ngai lo. City hian minute 90 an inkhelh chhungin David de Gea an chhaih buai miah lo a, kum 2012 hnua inkhel pumpuia goal shot an neih loh hmasak ber a ni - Inrinni zana West Brom an lenchilh hunah City hian hnehna an chang zo lo a nih chuan kum 2004 hnua match sarih chhung a zawna an chak loh rei ber a ni ang. Pep Guardiola an lakluh tirh khan tun dinhmun hi an ngaihtuah hauh lo ang.

United nen an inhmachhawn hmaa EFL Cup chu inelnaa a ngaihhlut loh ber a nih thu sawitu Pep erawh a hnual lo. Bayern Munich boss hlui chuan, "Match ruk chhung chak neih loh chu dinhmun ṭha tak a ni lo. Mahse, tunah hian inelna pakhat aṭangin pet chhuah kan ni chauh a, nomawi chawi tur pathum kan la nei a ni. Ka player naupang tak tak te khan an khel ṭha em em a, ka chhuang takzet a ni," a ti.

The Happy One

Manchester United tan an match hnu-hnung pangaa an vawi hnih chakna chiah a ni a, Jose Mourinho tan Chelsea laka mualpho hnu lawka City hneh leh hi player leh fan-te chawhphur nan a ṭangkai khawp ang. Portuguese manager chuan, "Chelsea laka 4-0 a tlawm kha he club ang sulhnu nei ṭha leh ropui hi chuan a phu lo a ni. Club ka enkawl a nih chuan ka rilru zawng zawng an tan ka pe a, ka thinlung hian fan-te lam a hawi ṭhin. Chelsea kan hneh loh zana an rilru tur kha ka hriatthiampui a ni, " tiin fan-te hnenah ngaihdam a dil.

Mourinho-a'n Real Madrid aṭanga Chelsea a pan leh khan 'The Happy One' tiin a inchhal a, ald Trafford-ah a hlim. Mourinho chuan, "Dik taka sawi chuan United fan-te anga min thlawp ṭhatu hi ka la nei ngai lo. 4-0 a tlawm hnu lawkah min la thlawp thei tho a ni. Zaninah pawh stadium an luah khat vek a, season thum chhe tak, result duhawm lo tak tih vel hian he club an hmangaihna hi a pawlh dal pha ve lo. Engemaw tak chu kan pek let a ngai a ni," tiin United-ah nomawi chawi ngei a tum.

Chelsea an tlawm

United sawp hnu lawka West Ham hneh loh hi Blues fan-ten an ngaihtuah kherin a rinawm loh - mahse, an captain John Terry kirna inkhelah 2-1 in an tlawm miau si. Kum 35-a upa defender lo kir hmain Blues tlarhnung laiah Gary Cahill, David Luiz leh Cesar Azpilicueta te inkawp ṭhinin match thum chhung goal chhuah an nei lo.

Mahse, September 11 hnua la inlan leh lo defender lo kir zanah Azpilicueta chu wing back-ah chhawr a ni a, Terry-a'n goal an chhuah chhanah mawh a phur ve ve. Hammers tan Cheikhou Kouyate-a'n goal hmahruai tauh lut turin Terry a zuan san a, Yard 18 aṭanga Edimilson Fernandes goal khung chu Terry tan lo dan theih niin lang mah se English defender hian a hna a thawk ṭha lo.

Blues tan injury time-ah Gary Cahill-a'n hnai set sawt aṭangin goal khat khung ve mah se an si phurh sut zo turin hunin a daih tawh lo a, 4-0 a United sawptu team aṭanga player pasarih thlak danglamtu Antonio Conte-a'n Hammers a zuam sual a, Bilic-a'n Premier League-a a chhawr ṭhan player hmangin Italian manager a tlawm.

Buaina a chhuak

Inkhelh zawh lamah West Ham leh Chelsea fan-te an intibuai a, London Stadium-ah bur leh ṭhu--thhleng hmangin an invawm! Inkhelh hma hauhin boruak a san avangin West Ham-in stadium-a ken luh phal loh leh tih phal loh 23 an puang a, mi pakua an man bawk!

West Ham boss Slaven Bilic chuan, "Football ṭha tak kan khel a, inkhel chungchang hian sawi a phu zawk a ni," tiin an khelh dana a lawm thu a sawi a, inkhelh zawha buaina chawk chhuaktute chu hremna na tak pek a duh thu a sawi lang nghal.

Premier League club inhma-chhawn dangah Southampton chuan Sofiane Boufal goal khung hmangin Sunderland chu 1-0 in an hneh a, Black Cats manager David Moyes chu penalty area-a a striker Victor Anichebe tih tluk a nih chungchangah mawi lo khawpa a chet avangin technical area
aṭangin hnawhchhuah a ni.