Murray-a'n Set a hloh ve ta

Andy Murray-a'n a zawna set 24 zet a lak tawh chu a chhunzawm thei ta rih lo, Erste Bank Open-ah a match hmasa berah Britain tlangval hian Martin Klizan chu 6-3, 6-7, 6-0 in a hneh.

World number 2 Murray hian hnehna chang tur hian darkar hnih leh minute 22 a mamawh a, set hnihna a hloh hnuah Murray hi a insiam ṭha rang hle a, an inkhelh tawp lama point hmuh theih 35 awm aṭanga 27 zet hmuin set hnuhnung berah game a hloh miah lo - second round-ah chuan Gilles Simon a hmachhawn leh dawn a ni.

Vienna, Austria-ah hian world number 1 Novak Djokovic a inlan ve loh avangin Murray tan ATP ranking-a pakhatna nena an inthlauhna tih zim theihna hun a ni. Kum 29-a upa Murray hian Erste Bank Open nomawi hi a chawi a nih chuan Djokovic tan a dinhmun ngai vawng nung turin October 29 aṭanga khelh ṭan tur Paris Masters-ah final a luh tal a ngai ang.

Kum 1974 June 3 khan khatih hunlaia kum 30-a upa Australian star John Newcombe chu a vawi khat nan world number 1 a lo ni tawh a, ani hnuah hian tun thlengin kum 30 tlin hnua number 1 ni thar thei an la awm leh ngai lo - Murray hian Newcombe-a hnua number 1 ni thar thei upa ber nih a tum mek.