BVT chakna Mawitea goal mawi
Bethlehem Vengthlang FC-in Mizoram Premier League Season 5 hmahruaitu ni turin nimin tlai khan Chanmari West FC chu 1-0 in an hneh a, goal awm chhun hi Lalnunmawia khung niin goal mawi bik a ni.
Lalbiaksanga Colney hoten MPL5-ah West Warrior vawi hnih an hneh theih avangin point 19 an hmu a, zanin hian anmahni hnaih bertu Chanmari FC-in (17 Pts) Dinthar FC an hma-chhawn ang. BVT hian an hmabakah match nga khelh tur an la neih avangin semifinal an lut lo a nih chuan thilmak a thlen a ṭul tawh ang.
Chak tum ve ve
Chanmari West FC-in an defender pawimawh R. Lalawmpuia (Mapuia) an chhawr theih loh avangin midfielder K. Lalnunzama'n chu Toky Zomuanpuia kawppui turin tlarhnungah dah luh a ni. Tlar hma lamah Lalmuansanga aiah Lalbiakhlua (Hlutea) dahluh a ni bawk a, goal khung ngei an tum tih a chiang.
Bethlehem Vengthlang FC-in Lal-dingngheta la chhawr thei lo mah se an veng tlangval an ziah luh thar Lalza-tluanga a la awm tho avangin cap-tain awm lo hi an tuar hran lo a, for-ward thar Mawitea thlawp turin Lalmawizuala (Ashtea) chu Lalrammuanpuia (Apuia) aiah dahluh a ni bawk.
Inkhel hmuhnawm
Ṭan phat aṭangin team pahnih an innawr tawn a, keeper buaina ni pha chiah loin club pahnih tlarhnungte an buai dun hle.
West Warrior-in chance ṭha nei hmasa zawkin Lalmuanzuala killer pass chu R. Laldanmawia'n goal sirah chiah a pet a, forward H. Lallianzama'n a hun ṭha neih a hlah bawk.
Goal mawi
Minute 33-naah Lalrintluanga (Tuka) ball vawrh luh chu West Warrior defender-te'n hmun himah an tauh thei lo a, ball kang chu Mawitea'n a ke dinglam hmanga a siam rem hnuah a ke vei lamin kawh zetin box pawn
aṭangin a pet goal.
Vanduaina
First half-ah West Warrior midfielder Hlutea'n goal ban a pet per a, second half-ah Reuben Zosangpuia freekick pet chuan goal ban a per leh bawk. Captain Dampuia'n freekick aṭanga BVT keeper Malsawmdawngzela hna a siamsak hnuah keeper chiah a hmachhawn hnuah goal ban a pet per bawk.
West Warrior lamin chance ngah zawk mah se BVT lamin goal hlauh-awm an nei ve reng a, Mawitea tauh goal chu offside vangin an pawm lo.
Chhum zing
Minute 71-naah chhum zin vangin inkhelh tihtawp a ni a, darkar chanve chuang chawlh a nih hnuah inkhel hi chhunzawm leh niin result erawh a danglam phah lo.
BVT hian November 4 khian Chan-mari FC an hmachhawn ang a, Chan-mari West FC-in I League club Aizawl FC an hmachhawn thung ang.
Round 10 ni hnuhnung zawka inkhel turte hi table-a a sang pali te an nih avangin chung lama awm club zingah point hloh an awm dawn tihna a ni a, hnuai lama awm club palite tan din-hmun siamṭhatna remchang a ni ang.
Tute nge inlan?
Bethlehem Vengthlang FC (4-4-1-1): Malsawmdawngzela; K. Lalmalsawma (Hmingthanmawia 71'), PC Laldinpuia, H. Lalhlimpuia, R. Lalrinsanga; PC Zosanga, Lalrintluanga (Lalrammuanpuia 41'), Zosangkima, Lalzatluanga; Lalmawizuala; Lalnunmawia
Chanmari West FC (4-1-4-1): Lalruatpuia; Racy Lalremmawia, K. Lalnunzama (R. Lalremruata 86'), Toky Zomuanpuia, Vanlalzuia Hnamte; Reuben Zosangpuia; R. Laldanmawia, Lalbiakhlua (Lalmuansanga 68'), Lalmuanzuala, Laldampuia; H. Lallianzama (PC Lalawmpuia 69')
ZoFooty Statistics
Bethlehem VT 1 - 0 Chanmari West
BVT : Lalnunmawia 33'
MoM : Lalnunmawia, BVT
42% Ball Possession 58%
16 Shots 23
6 On Target 7
2 Yellow Cards 0
0 Red Cards 0
Powered By Rainbow Multibrand
Mobile Showroom