German Cup-ah Bayern Munich-in last 16 an lut

German Cup champion lai Bayern Munich-in an nomawi humhim tura an zinkawngah harsatna an la tawk lo a, Nilaini zan khan last 16 lut turin Bavarian derby-ah Augsburg chu 3-1 in an hneh.

Bayern tan Philipp Lahm-a'n goal hmahruai a khung hnuah Julian Green chuan club tana a goal hmasa ber khungin a chhunzawm ve lehnghal a, South Korean striker Ji Dong-won chuan minute 68-naah goal khatin a chhanglet.

Mahse, Bayern-in keeper Manuel Neuer an nei a, German keeper hian Augsburg penalty hlawhchhuah South Korean midfielder Koo Ja-Cheol pet chu a dan sak a, injury time-ah David Alaba chuan Bayern chak nemngheh nan an goal thumna a khung leh thung.

Bundesliga champion-in chak result piahlamah chanchin lawm-awm an nei a, defender Holger Badstuber chu February-a hliam vanga a chawlh hnuah a vawi khat nan khelmualah a inlan leh ta bawk.

Borussia Dortmund-in last 16 lut turin minute 120 an duhkhawp lo. Thomas Tuchel-a enkawl team hian Union Berlin lakah Michael Parensen own goal hmangin hma hruai mah se German second division club tan Steven Skrzybski chuan an si phurh a sut a, extra time thleng pawha goal dang a luh loh hnuah penalty hmanga chak zawk zawn niin Dortmund hian 3-0 in hnehna an chang a ni.