Leonesa lakah Real-in goal sur tir

Real Madrid-in an hmatawng langsar Cristiano Ronaldo, Gareth Bale leh Karim Benzema te chawlhtir vek mah se an mikhualna ramah third division club Cultural Leonesa chu 7-1 in an sawp thei tho. Second leg khelh tur la awm mah se Zinedine Zidane-a naute hi Copa del Rey last 16 lut chiang tawh tluk an ni.

West Brom defender hlui Gianni Zuiverloon chuan minute rukna lekah an lamah ti lutin Real-in hma an hruai nghal a, goal hmahruai hi Marco Asensio leh Alvaro Morata te goal hnih ve ve bakah Nacho leh Diaz Mejia ten goal khat ve ve khungin an zui; mualneitu lam tana Martinez-a goal khungin an mualpho tur a hliahkhuh zo tawh lo.

Real Madrid hian midang zawng aiin first leg hi thla khatin an khel hmasa zawk a, a chhan chu December thla a khelh tur FIFA World Club Cup-ah an inlan dawn vang a ni, November 30 hian Bernabeu-ah second leg khel turin Leonesa hi an lo mikhual ve leh ang - season hmasa khan Barcelona chuan Real Madrid ang hian team dang aiin an lo khel hmasa zawk tawh bawk.

Real coach Zidane chuan, "Nacho goal kha chu mipangngai chunglam tan chauha tih theih a ni, kum 2002 Champions League final-a Bayer Leverkusen laka ka goal khung ai khan a ṭha zawk hialin ka hria," tiin kum 26-a upa Nacho-a'n box chhung chiah aṭanga ball kang a hlap luh chu a dah sang thiam hle.