Kuznetsova-i'n semifinal a lut

Women's Tennis Asso-ciation (WTA) Finals khel tura tling hnuhnung ber chu Svetlana Kuznetsova a ni a, Russian star hian a group match hnihnaah Karolina Pliskova hnehin semifinal lut thei hmasa ber a ni.

Singapore-a inkhelah kum 31-a upa Kuznetsova hian Czech Republic nula Pliskova chu 3-6, 6-2, 7-6 (8-6) in a hneh a, inkhel dangah Agnieszka Radwanska chuan 7-6 (7-1), 6-3 in French Open champion Garbine Mugu-ruza a hneh ve bawk.

Kuznetsova hian kar hmasa a khelh zawh tak Kremlin Cup a chawi khan WTA Finals a khel tur hian hmun a chang chiah a, a match hmasa berah champion lai Radwanska a hneh tawh bawk. Kuminah hian hmeichhe player inlan pariat zinga upa ber niin kum sarih a inlan tawh aṭanga
semifinal a vawi khat luhna chiah a ni nghe nghe.

Kuznetsova chuan, "Ka inkhelh hmasa zawkah ka khingpuiin match point a hmuh tawh ka pawtthla a, tunah pawh chutiang tho chu a ni. Mipuiin min ṭan em em tih ka hria a, anni min puihna vangin hetiang dinhmun thleng thei hi ka ni," tiin amah ṭantute chungah lawmthu a sawi.

White Group aṭang hian Kuznetsova chuan semifinal a luh chian tawh bakah Radwanska leh Pliskova ten beisei an la nei a, Red Group aṭangin world number 1Angelique Kerber a lut tawh bawk a,
Keys leh Halep ten hmun ruak pakhat an la inchuh dawn bawk.