Inter Milan tan Mauro Icardi a inlar leh ta
Nilaini zan Italian Serie A inkhelah Inter Milan tan tun hnaia fak hlawh lo val Mauro Icardi-a'n goal hnih khungin Torino lakah 2-1 in a club hnehna a chanpui. Champion lai Juventus chuan 5-1 a Sampdoria sawpin an hmahruaina an sawh nghet bawk.
Inkhel dangah Atalanta leh Pescara te inkhelh laiin first half-ah lirnghing vangin minute hnih chhung inkhel chawlh lailawk a ni a, he inkhelah hian Mattia Caldara goal khat khung hmangin Atalanta 1-0 in an chak. Italy a lirnghing hian Rome-a in ṭhenkhat chu a sawi na hle nia sawi ni mah se nimin thleng khan thi an awm thu sawi a la ni lo.
Hei le Icardi
Inter Milan captain Icardi-a'n a mimal chanchin ziahna lehkhabuah fans nena an buaina chungchang a ziah lan avangin Inter fan-te a chungah an lawm lo hle. "Ani hi kan captain a ni lo" tih leh "Kan tan a thi tawh" tih thute an tarlang nasa hle - hemi hnu hian boruak ṭha an la nei leh lo.
Buaina an tawh hnuah Argentina international Icardi-a'n ngaihdam a dil a, club lamin pawisa an chawitir bawk. Nilaini zanah erawh Icardi-a'n ṭawngkam chauh ni loin fans lakah goal hmangin ngaihdam a dil a, England goalkeeper Joe Hart goal venah vawi hnih khungin a zawna league match vawi thum an tlawm tawhna aṭangin chakni hmel a hmuh pui ta - Inter fans rilru na lutuk a dai deuh ngeiin a rinawm.
Inter boss Frank de Boer chuan, "Icardi maw? Ani hi chuan engtiklai pawhin khelmual chhungah hian a theihna zawng zawng a hlan tih ka chiang. Club thuneitu lamin kan chungah rinna an nghat ngam a, fans lam pawhin boruak ṭha lo kha chu an theihnghilh theih ka beisei. Point thum hmu tur chuan kan zavaia kan
ṭanrual a ngai a, boruak ṭha kan neih tawh sa hi kan chhawm nun theih ka beisei," tiin a sawi.
Kum 23-a upa Icardi hian kum 2013 khan Sampdoria
aṭangin Inter Milan hi a zawm a, San Siro a pan hnuah match 102 a khelh aṭangin goal 55 a khung tawh. A kum la tam lo mah se khelmual chhungah fak a hlawh ṭhin a, season hmasa ṭan dawn khan Andrea Ranocchia thlakin captain atan ruat a ni.
Juve nge nge
AC Milan laka chak lo hlim Juventus chu an match khelh leh hmasa berah an tho leh chiang hle. Massimiliano Allegri naute hian an mikhual Sampdoria chu 4-1 a sawpin league match 10 khelh aṭangin point 24 an hmu a, pahnihna AS Roma lakah point hnihin hma an hruai zel.
Turin-a inkhelah striker manto Gonzalo Higuain-a'n goal khung lo mah se defender Giorgio Chiellini chuan goal hnih a tauh luh bakah Mario Mandzukic leh Miralem Pjanic ten goal khat ve ve an khung bawk, mikhual Sampdoria tana rawlthar Patrik Schick goal khungin awmzia a nei thui lo.
Juventus boss Massimiliano Allegri chuan, "Higuain khan a khel ṭha hle a, chutihrualin goal khung tura Mandzukic theihna sanzia kha hmuh hmaih theih a ni lo. Anni pahnih hi ṭha takin an khel dun thei ang tih ka chiang a, Sampdoria lakah khan minute 90 chhung inrem takin an inkawp thei," tiin a sawi.
Inkhel dangah Roma tan Manchester City striker hlui Edin Dzeko chuan goal hnih khungin Sassuolo 3-1 in an hneh. Bosnia and Herzegovina international hian tun season-ah Serie A match riat a khelh
aṭangin goal 10 a khung tawh a, season kal mekah ani aia goal khung tam an awm lo.