A chung bera awm tum Highlanders

Zanin dar 7:00-ah NorthEast United chuan Atletico de Kolkata an mikhual dawn a, Nelo Vingada enkawlna hnuai-a khel team hian hnehna an chang emaw draw result an hlawh chhuak thei a nih chuan Indian Super League-ah hmahruaitu dinhmun an luah leh thei ang.

Thawhlehni zana ATK hnehtu Mumbai City chuan vawi khata khel hnem zawk chungin Highlanders hi table chung berah an luahlan a, point 11 an hmu. Vawi ruk khelha point 10 hmutu NorthEast United hian zaninah Mumbai khelh zat hi an khel ve chiah dawn tihna a ni.

NorthEast United-in goal li khung tawhtu Lazio striker hlui Emiliano Alfaro an kawl a, ATK lamin ISL season hmasa bera Hero of the tournament Iain Hume an kawl bawk. Portugal boss hlui Nelo Vingada enkawlna hnuaiah Highlanders tan Mizo rawlthar rual Lallianzuala Chhangte, Jerry Mawihmingthanga leh Lalrempuia Fanai ten hmun an chang meuh lo a, ATK lamah Lalrindika Ralte chuan inkhel bul ṭan khat mah se a inlan ziah a, Robert Lalthlamuana chuan an match hnuhnung bera Mumbai an hneh loh ṭumin inkhel bul a ṭan ve leh tawh bawk.