An intawng leh dawn ta - Zanin dar 7:00 Chanmari Vs Dinthar
Zanin dar 7:00 hian foreinger nei lo Chanmari FC-in Nigerian defender Balogun Hammed leh midfielder Clarence Carter Ezebube kawltu Dinthar FC an hmachhawn dawn.
MPL hmasa bera champion Dinthar FC-in season thum chhung nomawi an chawi loh hnuah pawh an supporter 'Maimawms' ten player leh coach te phur theihna tur au hla ṭha tak tak an nei thei reng a. Chanmari erawh season hnih chhung Aizawl FC-in an ropuina an hliah khuh sak hnuin an veng mipuiin Lammual lamah an ṭawiawm ṭha tawk lo.
An tam ang
Zirtawpni zan a nih avangin inkhel en a remchang a, Dinthar mipuii an veng pa Lalhlupuia Sailo bakah an veng club an ṭawiawm ṭha chho leh tawh bawk. Maimawms hian zanin hian Chanmari FC auh el dan tur hla ṭha tak an phuahchhuah leh ngei beisei a ni a, hei hi neutral supporter tan pawh Lammual pan chhan a tling.
Chanmarians lam hian engtiklai mahin Maimawms laka tlawm an duh lo a, an veng club hi MPL5 hmahruaitu an nih leh tawh bawk avangin Lammualah jersey pawl ha an tam ang. Chanmari FC hi 'Bye Bye' tichhuaktu kha an ni tih hriat reng a ṭha a, an khuang pui nen Dinthar-in an auh elna hla an ngaithla mai mai lo ang.
Foreigner ṭha
Foreign player zawng zawng an ṭha vek lo a, Nigerian player zingah pawh fuh lo fe fe an tam. Dinthar hian defender Balogun Hammed leh midfielder Clarence Carter Ezebube lalut tur hian risk an la a, an match khatna aṭanga thlir chuan an tifuh.
Clarence hian midfield-ah awlsam takin a khel a, ball pek a thiam tel bawk avangin Dinthar game siamtu a ni tih hmuh hmaih theih a ni lo. Nigerian defender Balogun Hammed-a'n tharum an ngah bawk a, foreigner ṭha pahnih an kawl avangin Dinthar hi MPL5 hmahruaitu Chanmari FC aiin an hniamna bik a awm lo a, mi tam tak chuan MPL1 champion hi team ṭha zawkah an ngai ang.
Dinthar FC coach Lalhlupuia Sailo chuan, "Kan dinhmun thlirin Chanmari FC aiin point thum kan mamawh zawk a, chuvangin chak turin kan thawhrim zawk a ṭul. Team ṭhat lamah chuan kan intluk tawk a, game plan kal fuh zawk an chak ang," tiin an intluk tawk thu a sawi.
Engtin zel?
Dinthar FC-in Aizawl FC aṭangin Michael Lalremruata chuai tawh lam an lalutah an ngaihsak a, tunah erawh Khatla tlangval hian MPL5-ah goal nga a khung tawh avangin I League club pawhin an mamawh tak player an chhuahah an inngai tawh hial ang.
Michael-a thlawp turin Lalruatpuia a ṭha tawk em em a, Chanmari FC hneh tur erawh chuan Lalbiaknia leh coach thar hnuaia hmun pawimawh chang Saihmingthanga te an khelhṭhat a ṭul bakah tlarhnungah defender Balogun Hammed kawppui Vanlalchhanhima'n Mizoram tana khel tawh leh khel tlak defender a nihzia a lantir a ṭul bawk ang.
Sawmfela telna
Chanmari FC-in foreigner nei lo mah se Malsawmfela an kawl avangin goal khung lamah harsatna an tawk lo. Sawmfela hi amah thlawptu Lalruatfela Zote a dam leh tawh bawk avangin goal hmaah a hlauawm lehzual a, Ramhlun South tlangval hian goal nga a khung tawh.
Lalsangzuala Hmar hoten hian player inlak belh si loin Reuben Zosangpuia leh Isaac Lalruatpuia te an chhuahtir avangin an intawn hmasak zawk aiin an squad a pan a, amaherawhchu Chanmari tlangval Rochhingpuia midfield-ah a hmuhnawm leh tawh. Chhinga hi a tlan tamna aia a ball sem thiam vanga hriat lar a ni a, Chanmari tlangval hi goal nawr kawngah ṭangkai mah se Sanga duh danin 'pressure' a pe ve reng thei ang em tih hi zawhna awm thei chu a ni.
Chanmari FC-in an match hnuhnung bera Zo United an hneh ṭumin Chanmari mipuiin an player an auh el hnuah coach-in an attacking player pakhat a thlak. Hemi chungchanga inkhelh bana an zawh ṭumin Chanmari FC boss Sanga chuan, "Coach ka ni a, ka duh ka luhtir thei ang a, ka duh sub-ah ka dah ang a, ka duh ka la chhuak ang a. Tactical move pawh ka thlak thei a, game plan pawh ka thlak thei a, formation pawh. Chuvangin fans thawm kha bengchheng mah se ka buai phahna a ni lo a, ṭul ka tih vanga la chhuak ka ni," tiin supporter-te duh dana thutlukna a siam loh thu a sawi.
Round 8 zawhah Chanmari FC-in point 17 an hmu a, table hmahruaitu niin vawi khat chiah an la chak lo. MPL2-a Chanmari FC an champion ṭum khan Round 8 zawhah Vanlalthlanga hoten point 17 tho an hmu a, Sanga kaihhruai hian goal 17 khungin MPL-a an champion ṭum aiin goal liin an khung tam zawk. Amaherawhchu Thlanga'n tlarhnung a rem phui zawk a, goal thum chauh an chhuah laiin Sanga hoten goal sarih an chhuah tawh.
An sawi 'Bye Bye' chu
Chanmari FC leh Dinthar FC te hi vawi 14 an inhmachhawn tawh a, chung zingah chuan April 25, 2014-a an intawn ṭum kha a la chhinchhiahtlak ber. MPL2 final lut chiang tawh Chanmari FC-in final-ah an elpui Dinthar FC an hmachhawn duh lo a. Goal kua zet luhna inkhelah Chanmari 5-4 in an chak a, Dinthar final kalkawng an hnawh phui sak. He inkhel hi MPL bika intih elna atana 'Bye Bye' an hman ṭum a ni a, Chanmari ṭantuten Dinthar an 'Bye Bye' chiah kha chu Lammuala neutral supporter pawhin Maimawms tana a nat dan tur an hrethiam khawp ang.
Kumin September 8 kha an intawn hnuhnun ber niin MPL5 Round 2-ah chak zawk an awm lo a, 2015 I Day Football group stage-a an intawng ṭumin an inhnehtawk bawk. Dinthar leh Chanmari hi vawi hnih chiah an la inhnehtawk avangin zanin pawh hian point thum hmu zawk an awm ngei a rinawm.
Chanmari 9 - 3 Dinthar
MPL1 - December 12, 2012
Chanmari FC 2 - 0 Dinthar FC
MFA Cup Final - April 6, 201
Chanmari FC 2 - 0 Dinthar FC
MPL1 - April 13, 2013
Chanmari FC 3 - 1 Dinthar FC
I Day Football Final - August 14, 2013
Chanmari FC 2 - 1 Dinthar FC
MFA Super Cup - October 4, 2013
Chanmari FC 3 - 1 Dinthar FC
MPL2 - November 15, 2013
Chanmari FC 0 - 1 Dinthar FC
MPL2 - April 25, 2014
Chanmari FC 5 - 4 Dinthar FC
MFA Super Cup - August 29, 2014
Chanmari FC 3 - 2 Dinthar FC
MPL3 - October 9, 2014
Chanmari FC 1 - 0 Dinthar FC
MPL3 - November 14, 2014
Chanmari FC 0 - 2 Dinthar FC
I Day Football Group Stage - August 3, 2015
Chanmari FC 1 - 1 Dinthar FC
MPL4 - October 9, 2015
Chanmari FC 0 - 1 Dinthar FC
MPL4 - November 5, 2015
Chanmari FC 2 - 1 Dinthar FC
MPL5 - September 8, 2016
Chanmari FC 1 - 1 Dinthar