Chhinga Veng nge Zo United?

Vawiin tlai dar 3:00 hian a zawna vawi li chak tawh lo Chhinga Veng FC-in semifinal thlen la inbeisei Zo United an hmachhawn dawn a, Mizoram Premier League Season 5 inkhel pawimawh a ni.

Chawngthansanga hnuaiah Chhinga Veng FC-in match li khel tawhin chak an la nei lo a, an chak lohna hi goal khat zel a nih avangin an vanduaiah a ngaih theih. Zo United an danglam tam lo, coach thar Remlalthlamuanpuia (Sabito) hnuaia an match hmasa berah Chanmari FC 2-1 in an hneh bik lo.

Chhinga Veng FC coach Chawnga chuan, "Point 18 kan hmaah a awm a, semifinal lam ngaihtuah loin Zo United hneh phawt kan tum ang. Kan player ten pressure an neih loh nan training pawh hahdam thei ang berin ka nei a, Zo United pawh hi nuam ti taka hmachhawn turin ka fuih," tiin Vanglaini palai a hrilh.

MPL kaithar hian an striker pawimawh MS Dawngliana an khelhtir dawn a, MPL top scorer leh best forward ni tawh Dawngtea leh Lalkhawpuimawia inkawp chu Zo United tan buaina tham a tling ang.

Zo United coach Remlalthla-muanpuia (Sabito) chuan, "Season tir aṭangin Zo United hi enkawl ila, Chhinga Veng-ah hian ka player duh pathum vel lai an awm. Team ṭha an ni tih ka hria a, chak lohna erawh an nei thung. An chak lohna laiah tak chhut kan tum dawn a, point thum hmuh kan tum," tiin a sawi.

Zo United hian point sarih an hmu a, semifinal lut thei turin Sabito-a hote hian beiseina nei mah se Chhinga Veng hi an hneh lo a nih chuan table mawgphahah an awm thei bawk. Club pahnih hi Phase 1-a an intawng ṭumin goal awm loin an inhnehtawk.