Premier League club bihchianna Spurs tana Anderton record a him em?

Anderton hi kum 48 mi a ni tawh a, 1992–2004 chhung khan London club tan hian khelin tun thlengin Spurs tana Premier League-a inlan hnem ber leh assist nei hnem ber a ni reng. Goal khung tam lamah erawh Kane-a'n goal 136 khungin Teddy Sheringham (97) aiin goal 39 in an khung tam zawk a, tuna Spurs tana khel lai Son Heung-Min (51) aiin goal 85 zetin a khung tam zawk.

Tottenham captain Hugo Lloris hian 2012 aṭangin London club tan hian a khel tawh a, Spurs hi Premier League-ah vawi 147 a chakpui tawh. Lloris leh Kane hi chu football en ṭhin tan mi thar an ni lo a, Manchester United sawmna hnawl tawhtu Anderton erawh hre lo an awm nual ang.

Darren Robert Anderton hi March 3, 1972 khan Southampton, England-ah a piang a, a theihna sang tak avangin a naupan lai aṭangin professional club scout-te beisei a sang nghal. Naupan lai hian Southampton Tyro League-ah Itchen Saints tan a khel a, 1990 khan England World Cup champion puitu zinga mi Alan Ball-a'n Portsmouth-ah a lalut.

Inhliam vanga a buai ngun avangin keeper Andy Gosney-a'n 'Sicknote' tihin a hming a phuahsak a, khelmualah erawh a thiamna a pholang reng. Portsmouth hi second division club an ni a, semifinal-a Liverpool nen an inkhelh ṭumin Anderton hian goal a khung. Kum 1992 khan Premier League club Spurs-in Anderton hi pound maktaduai 1.75 in an lalut a, London club-ah a thiamna phochhuak nghal lo mah se kum hnih hnuah Terry Venables hnuaiah England tan a khel phak a ni.

Anderton hian Premier League nomawi a chawi lo a, kum 1999-a League Cup nomawi a chawi bak nomawi lian a chawi lo. Chutihrualin Anderton hian Manchester United zawmna hun ṭha a nei a, Spurs-a cham a thlan tak avangin nomawi a chawi tlem phah tihin a sawi theih.

Kum 1995 khan England leh Sweden an inkhel a, minute 90-naah Anderton hian mawi zeta volley-in siphurh sutna goal a khung a, 3-3 in an inhnehtawk. Anderton chuan, "Inkhelh bana hotel kan thlen hnuah Gary Pallister (United defender) a rawn kal a, 'Ka bula khelh i duh em? kan pu i number ka pe thei ang?' tiin min zawt a. A pawi hleinem tiin ka chhang," tiin United-in an sawm thu a sawi.

Sir Alex Ferguson-a'n Anderton-a release clause a tlem tih a hria a, Old Trafford-ah lakluh ngei a tum. Amaherawhchu, Anderton-a'n Spurs neitu Alan Sugar a hmu a, a buai zo ta. Anderton chuan, "Sir Alan Sugar-a'n chhuah min phal lo a, ka release clause thai chhiatna tura contract thar ka ziah phawt loh chuan a in chhuahsan min phal lo," tiin United a zawm loh chhan a sawi.

Darren Anderton-a'n a ball thiamna hmangin Spurs ṭantute lawmna a siam a, London club-ah hian season 12 chhung chamin Premier League-ah ringawt match 299 a khel a. English midfielder hian assist vawi 67 a nei a, amah hnaih bertu Christian Eriksen-a'n Inter Milan a pan tak avangin asssist record hi chu a him rih dawn.

Chutihrualin Anderton hi hliam vanga a buai ngun avangin a khel tam tawk lo a, a record kawl pawh hi a him reng lo ang. Spurs keeper Hugo Lloris hian match 251 a khel tawh a, season hnih dang a la cham a nih chuan Anderton-a record hi a khum ngei ang. 

Anderton record hi an khum ta a nih pawhin Manchester United hnawltu English midfielder hi Spurs ṭantute chuan an hre reng dawn. England ṭantute tan pawh Anderton hi a hlu a, Euro 1996-a semifnal an thlen ṭum khan player pawimawh a ni.