Entu awm loa khelh a fuh ka ring - Becker
German tennis legend Boris Becker chuan inkhel loa awm reng ringawt chu ṭha a ti lo a, inelna buatsaihtu lam chuan fans tel loin tournament kalpui mai se a ṭhat a rin thu a sawi chhuak.
Covid-19 vangin tennis season an chawl mek a, a hma berah pawh July thla chawhnu lamah bak an khelh chhunzawm hmel lo. Wimbledon phei chu khelh a ni dawn lo hial a ni.
Becker chuan, "A nihna tak sawi chuan player ranking hniam zawkte chuan pawisa an mamawh, player ṭhenkhat chuan an inkhelhna bakah sumdawnna aṭangin pawisa an lalut hnem a, hun rei tak inkhel lo pawhin an awm thei ang.
"Mahse, player ṭhenkhat erawh an sum leh pai dinhmun a ṭha vek bik lo, tournament an khelh aṭanga an sum hmuh chhuah ringa khawsa an awm bawk. Ka hmuh dan chuan infiamna hrang hrang zingah tennis chu entu awm loa khelh theih a ni," a ti.
Tennis player dinhmun a inang lo a, hun kal tawh lamah player ṭhenkhat chu hliam tenau nei chung pawhin Grand Slam bikah phei chuan an inlan lui ṭhin. US Open 2019 khel phak chin kha chuan a tlem berah Rs 8,42,545 an dawng vek.