Roma player leh coach inpekna a thuk
Covid-19 hri lengin football club a nghawng na hle a, a tuar na zingah AS Roma an tel. Italian club Roma player leh an coach Paulo Fonseca chuan sum lama an club a tlak chhiat lutuk loh nan thla li chhung hlawh lak loh an remti.
An inrem dan chuan player zawng zawng, coach leh coaching staff-te hian March, April, May leh June thla hlawh an la dawn lo. Serie A an khel chhunzawm thei lo a nih chuan Roma hian lawmman siamsak ve a thum thung.
Roma CEO Guido Fienga chuan, "Captain Edin Dzeko, player zawng zawng leh Paulo te chuan club dinhmun an hrethiam a, hlawh lak loh an remtih avangin an chungah kan lawm takzet," tiin a sawi.
March 9 aṭang khan Serie A hi an chawl lailawk tawh. Italian Football Federation (FIGC) chuan May thla tawp lampangah hian entu nei loa league khelh chhunzawm theih an beisei, mahse club lamin training pawh an la neih loh avangin an inkhelh hun tur a la chiang lo.
Italy-ah hian coronavirus kai an tam hle a, mi 23,000 chuang zetin an thihpui tawh. Khawvelah United States tih lohah chuan ram pakhata thihpui an tamna ber an ni hial.