Ronaldo-a'n Club World Cup khel dawn lo

Footballer ropui Cristiano Ronaldo chuan Club World Cup khelh a tum loh thu a sawi chiang ta. Kum 40 mi Ronaldo hian tun thlaah Al Nassr-a a contract a hmang zo tawh dawn a, tun hnaiah Saudi Arabian club hi chhuahsan tur ni awm takin social media-ah post a nei.

May thla khan FIFA president Gianni Infantino chuan CWC-a Ronaldo inlan theih dan tur an ngaihtuah thu a lo sawi tawh bawk a, Portuguese forward hian Club World Cup khel tur club a zawm mai rinna a lian hman hle.

Mahse, kum 40 mi Ronaldo chuan, "Club World Cup-ah ka inkhel dawn lo. Min sawmtu team ṭhenkhat an awm a, ṭhenkhat chuan awmzia a nei viau a, ṭhenkhat erawh awmzia pawh nei lo a ni. Chutihrual chuan thil zawng zawng hi tih vek theih a ni lo a, tel vek theih a ni lo," a ti.

Ronaldo hian Al Nassr a pan hnuah match 111 khelin goal 99 a khung a, nomawi a la chawipui lo thung. Al Nassr hian an forward hi chelh theih an inbeisei niin khawthlang media-te chuan an tarlang.