Chelsea-in Gittens lakluh an tum

Europa Conference League champion Chelsea pawhin squad thuamchhah dan tur an ngaihtuah ve zel a, Borussia Dortmund aṭangin forward Jamie Gittens chu lakluh tumin an dawr mek.

Kum 20 mi winger hian Stamford Bridge pan a hreh lo a, Chelsea hian kum sarih atan contract an zawrh - mimal thilah indawrna a kal mek a, club lamah inremna a la awm chiah lo bawk.

Blues hian Gittens-a manah hian pound maktaduai 30 an phal nia sawi a ni a, mahse, German club hian £40mtd aia tlawmin an player hi hralh an tum lo.

Chelsea hi an hmanhmawh hran lo nia sawi a ni a, an duh anga inbiakna a kal chak lo a nih pawhin Club World Cup zawh lam nghah pawh an pawi ti lo niin an sawi.

Blues hian player dang an melh reng tho a, Ipswich Town aṭangin striker Liam Delap an la lut tawh a, AC Milan goalkeeper Mike Maignan chu lakluh an tum bawk.

Gittens hi Manchester City academy chhuak niin, kum 2020 khan Dortmund a zawm. 2021-22 season-ah a match hmasa ber a khel a, season hman zawh takah khan match 48 khelin goal 12 a khung a, assist vawi nga a nei.

Mahse, February aṭanga Dortmund kaihruaitu manager Niko Kovac ruahmannaah a tel lo a, hei hi Chelsea hmanhmawh loh chhan niin a lang - tlawm taka lei an tum.