England chak hram - Tuchel a lawm lo

FIFA World Cup qualifier-a an match thumnaah England an chak. Inrinni zan khan Andorra chu 1-0 in an hneh - captain Harry Kane chuan inkhela goal awmchhun a khung a, match thum an khelha vawi thum an chakna a ni.

England-in hnehna chang mah se, coach Thomas Tuchel erawh a lawm lo a, German coach hian FIFA ranking-a 173-na ram laka 'chak hram' tur team-ah a inngai lo. Inkhelh zawhah a naute na takin a sawisel.

Tuchel chuan, "World Cup qualifier khelh tur angin kan khel lo a ni," a ti a, Andorra lakah a naute chu an 'serious' tawk loah a ngai a, a lawm lo hle.

A hming Kane

Kane leh inkhel sawi zawm a nih tawh chuan, goal sawi tel a ngai ziah! Inrinni zanah pawh beisei phak lo England tana goal khungtu chu Harry Kane a ni a, minute 50-naah inkhela goal awmchhun a khung.

Bayern Munich striker hi Curtis Jones chuan ball pein, a 'shot' hmasa zawk chu Andorra keeper Iker Alvarez chuan dang mah se, a per lehlam chu Chelsea forward Noni Madueke ke bulah a tla.

Madueke hian Kane tan a siamsak nghal a, England captain hian goal-ah a chantir. Kane hian ram tan match 106 a khelhah goal 72 a khungna chiah a ni a, English striker a vul zel.

Mahse maw...

Barcelona khawpuia inkhelah England-in beisei an phak lo a, half time-ah fan-ten au el a, inkhelh zawhah pawh thawnthu a danglam lo - coach Tuchel pawhin a naute a dem.

Cheslea coach hlui hian, "Hun tawp lam minute 20 kha chu kan nungchang avangin ka hlauthawng a, ka lungawi lo hle. World Cup qualifier khel kan ni a, kan rilru kan pe tawk lo kha a pawi ka ti.

"World Cup qualifier khelh dan tur angin kan khel lo a, game kan khar danin min tilawm lo a, ka naute che vel kha hmuh nuam ka ti lo," a ti thlawt!

World Cup maw?

UEFA hnuaiah ram 55 an awm a, hrem vangin Russia-in World Cup qualifier an khel thei lo. Group 12-ah ram 54 hi ṭhen hran niin, group A-F thleng hi group tinah team pali an awm a, group G-L ah hian team panga zel an awm thung - an inkhelh kual hnuah group tina hmahruaitu ṭheuh chu World Cup khel turin an tling ang.

League round aṭanga tling zo lo, group-a pahnihnate chuan playoff an hmachhawn leh ang a, hetah hian group tin aṭanga pahnih ṭheuh bakah hian 2024–25 UEFA Nations League-a ti ṭha palite an tel bawk ang.

Nations League-a ti ṭha palite hi qualifier-a pakhatna emaw pahnihna emaw an nih chuan qualifier hmangin World Cup an tling nghal thei a, playoff khel turin an tling nghal thei bawk - hei vang hian an aiawh tur thlan danah pawh ruahmanna a awm sa.

A kalkawng zel

Qualifier-a pakhatna emaw pahnihna emaw ni lo aṭangin thlan tur a ni a, Nations League-a an ranking en mai tur a ni. Playoff khel tur ram 16 te chu an ṭhat dan mila thliar an ni ang a, pali zelin group paliah ṭhen an ni ang.

Group tinah hian semifinal leh final a awm ang a, heta chak ber zel hi World Cup khel turin an tling dawn a ni. Europe hi World Cup-a team thawhhnem ber tur an ni a, UEFA hnuaia ram 16-in khawvela ennawm ropui ber hi an khel thei dawn.

Europe bikah hian group A-F ten qualifier match an la khel miah lo a, group G-L ten an khel nual tawh thung. England hi group K-ah Albania, Latvia, Serbia leh Andorra te nen an awm ho a, match thum an khelh tawhah an la chak vek avangin World Cup chu an khelh ngei a rinawm.