Ngannou-a'n Jon Jones chona a pawm

MMA fighter rothap Francis Ngannou chuan UFC heavyweight champion Jon Jones chona a pawm thu a sawi chhuak a, fighter pahnih hi an inhmachhawn thei a nih ngai chuan khawvel ngaihven a hlawh khawp ang.

Kum 38 mi Ngannou hian kum 2023 khan UFC a chhuahsan a, hetihlai hian UFC heavyweight champion a nih lai niin, a champion kawnghren a kalsan - Professional Fighters League (PFL) a zawm zui.

Mahse, PFL-ah hian vawi khat chiah fight la hmachhawnin, heavyweight champion a ni mek a, boxing-ah boxer ṭha Anthony Joshua leh Tyson Fury hmachhawnin, a tlawm ve ve bawk.

Tun hnai khan Ngannou-a coach Eric Nicksick chuan, a fighter chu UFC-a kir thei dinhmunah a din thu sawiin, a tan chuan UFC chu ṭha bera a hriat thu thlengin a sawi.

Hei hi Jones chuan lo chhanglet vatin, UFC heavyweight champion chuan, "Francis Ngannou-a'n lo kir a duh thu ka lo hria a, fight ropui tak neih dun a châkawm khawp mai. Champion pahnih kan inhmachhawn dawn a ni.

"UFC belt lo kawl tawhtu a ni a, keiin kum sawm chuang ka belt ka humhim tawh bawk. Lal pahnih kan intawng dawn - hei lo liama fight ropui tur a awm chuang hleinem," a ti.

Ngannou chuan, "UFC lam lo chingfel la, keiin PFC lam ka lo chingfel ang - tichuan heavyweight-a lal dik tak chu kan hre mai dawn alawm," a ti a, fighter pahnih hi an incho tawn hle.

Hetihlai hian Dana White chuan kum 2023-a Ngannou a chhuah khan, "UFC-ah a lo kir leh tawh ngai lo ang," tiin a lo sawi tawh a, White hi a inphah hniam thei ang em, tih chu zawhna a ni.

PFL chief Donn Davis chuan, "A chak zawkin sum dawng vek se la, a chak zawk lam company-in hlawkna pawh tel vek rawh se," tiin a fighter tan Jon Jones hi a lo cho ve hle!

Ngannou hian MMA-ah vawi 21 fight hmachhawn tawhin, vawi 18 a chak a, vawi thum a tlawm tawh thung. Jon Jones hian vawi 30-ah vawi 28 hnehna changin, vawi khat a tlawm a, vawi khat chu 'no contest' a puan a nei bawk - UFC-ah hian light heavyweight leh heavyweight title a hlawh chhuak tawh.