Ngaihven hlawh tur 2025 FIFA Club World Cup
Football-a thuneitu sang ber FIFA chuan tun hmaa neih ṭhin FIFA Club World Cup-ah duh khawp hmuin kumin aṭangin inelna ropui zawk buatsaih a tum a, team 32 zet an tel dawn. Inelna hi June 14 - July 13, 2025 inkar hian United States-ah khelh a ni dawn a, FIFA-in a ngaih pawimawh miau avangin ngaihven a hlawh dawn.
Club World Cup chu
FIFA hian khawvel hmun hrang hranga club-te inelna Club World Cup chu kum 2000 khan a buatsaih ṭan a, inelna hmasa berah hian team riat telin Corinthians an champion. Kum 2001-ah Spain-a neih tum ni mah se sum lam harsatna avangin neih chhun zawm a ni lo a, hemi hnu kum thum chhung hi a reh zui vang vang bawk.
Kum 2005 aṭangin ṭan leh a ni a, team paruk an tel. Hemi hnu hi chuan kum tinin neih chhoh a ni a, kum 2007 aṭangin team pasarih telin inelna hnuhnung ber kum 2023-ah pawh khan team pasarih an tel. Saudi Arabia-a inelna neih ṭumah Manchester City chuan final-ah Fluminense 4-0 a hnehin an champion.
Inelna hi first round, second round, semifinal leh final-ah ṭhen ṭhin a ni a, European champion leh South American champion te hi semifinal aṭang chauhin an khel ṭan. Man City an champion ṭumah pawh final-a Fluminense an hneh hma hian semifinal-ah Urawa Red Diamonds chu 3-0 in an hneh a ni.
Inelna tak tak
FIFA-in ruahmanna thar a siam a, team sarih chauh inelna kha, team 32 a ni tawh dawn. Team tel an ṭhat hnem avang ringawt pawhin ngaihven a hlawh nghal a, player-ten hahdamna hun an neih meuh loh avangin sawiselna pawh a ri ring nghal hle.
FIFA-in tlawm a tum lo a, inelna hlawhtlin thlen nan ruahmanna pawh an siam ṭha. Khawmualpui hrang hrang aṭanga tel thei zat uluk takin an bituk a, football thiam ber khawmualpui UEFA-in team 12 an thawh. South America-in team ruk an thawh a; Asia, Africa leh Noth America lamin team li ṭheuh an thawh a, Oceania-in team khat thawhin inelna thlengtu Unites States-in team khat an thawh bawk.
Sum a tam
Inelna ti hlutu chu sum a ni a, tun inelnaa FIFA tawktarh ber pawh sum a ni. Team 32 insem tura sum awm zat chu dollar tluklehdingawn khat a ni a, champion team hian dollar maktaduai 125 an dawng pha thei dawn.
Group stage-ah hian team pakhat tan match thum a awm a, vawi khat chakah dollar maktaduai hnih an hlawh dawn a, an inhnehtawk chuan dollar maktaduai khat ve ve an insem ang. An thlen san dan a zirin pawisa a dawn belh zel thei a, champion tan hian $40mtd dah niin final-a vanduai zawk tan $30mtd dah a ni bawk.
Inelna hmachhawn hrim hrim hian sum dawn tur a awm bawk a, Europe club-te chu an club dinhmun aṭangin $12.81–38.19 mtd dawng thei an ni. Team nem bera ngaih Oceania aiawh pawhin $3.58 mtd an dawng dawn.
Player ṭha rual
Inelna hmachhawn tur zingah Inter Miami CF an tel a, Lionel Messi-a'n inelna a hmachhawn dawn. Messi telna a nih avangin inelna hian ngaihhlut a hlawh sawt dawn. Cristiano Ronaldo erawhin a club khelhna tur a la ti chiang lo a, Club World Cup khelh theih dan tur zawn sak nasa mah se Portuguese forward hi a inlan a rinawm lo zawk.
Europe aṭangin club ṭha Real Madrid, Manchester City leh Bayern Munich bakah UCL champion thar PSG te an tel dawn a,, ngaihven a hlawh dawn. Chutihrualin fan base nei ṭha Barcelona, Liverpool leh Manchester United te tel lo erawh inelna buatsaihtu lam tan chhanna nasa tak a ni thei ang.