Liverpool leh Premier League nomawi kar dantu - match hnih!

Mahse, Merseyside club hian Champions League ai pawha duh zawk an nei a, chu chu kum 30 chhung an nghah tawh Premier League nomawi a ni - league champion nih chakin an tuihal takzet. 

Liverpool-in duhthusama ṭhain 2019-20 season an hmang a, March a herchhuah meuh chuan Liverpool-in league nomawi chawi tura an mamawh zat chu match hnih chauh a ni tawh!

Mahse, khelmualah Reds-in chelh theitu tawng lo mah se khawvel ngam loh coronavirus an ngam bik lo a, chelh din an ni. League match hnih chak bak mamawh tawh lo chungin Liverpool an chawl mek a, an hun tawn ang duhawm lo tak tawng hi club an lo awm nual tawh. 

Kum 1980 chhoah khan Everton-in an vanglai hun an hmang a, 1984-85 season-ah anmahni hnaih bertu Liverpool aia point 13-a sang falin league nomawi an chawi a, European Cup Winners' Cup-ah an champion a, FA Cup final-ah an chak lo thung. 

Mahse, Everton tan chanchin lawmawm lo pakhat a thleng - an hmelma kumhlun Liverpool chuan European Cup final-ah Juventus hmachhawnin an ngam lo a, 1-0 in an tlawm. He inkhelah hian Reds fan-ten buaina an siam a, Juve fans 39 ngawtin an thih phah a, mi 600 an inhliam.

 

European Cup final-a thil thleng duhawm lo tak avang hian English club-te chu tun hnua Champions League tih tak inelnaah hian kum nga chhung inlan thei lo tura hrem an ni a, hemi kum nga chhung hian Everton hi league-ah vawi hnih an champion - mahse European Cup an inlan thei lo vek!

Hetihlai hi English club-in European Cup an thunun lai a ni a, Everton hi inlan thei se an champion lo ang tih sawi har tak a ni - 1976-1985 inkara European Cup-ah vawi hnih chiah English club ni lo an champion. 

1985-86 season-a Everton striker Gary Lineker chuan, "Ka khelh tawhnaah Everton kha kan la ṭha ber," tiin a sawi - English striker ropui ṭhin hi Leicester City, Barcelona, Tottenham Hotspur leh England national team tana khel tawh a ni. 

Dejan Savicevic, Dragan Stojkovic, Robert Prosinecki, Davor Suker, Predrag Mijatovic leh Zvonimir Boban-te ho hming i hria em? Kum 1990 chho khan sawi hluai kai khawpa player thiam bik an ni a, Yugoslavia mi leh sa vek an ni!

Kum 1987-a World Youth Championship nomawi chawitu team hian World Cup Italia 1990-ah khan quarterfinal an thleng a, beiseina a sang hle - mahse kum hnih liam hnuah tualchhung buaina avangin Yugoslavia chu United Nations-in a hrem a, Euro an khel thei lo zui. 

Mi tam takin 'dream team' ang hiala an ngaih team hian Euro 92 leh World Cup 94 an khel thei lo zui a, 1992-ah hian an aiawh Denmark chuan mak takin European Championship nomawi an chawi hial. 

1994 Champions League final-a Savicevic leh Boban telna AC Milan-in Johan Cruyff-a Barcelona an hneh dan en tan phei chuan World Cup 94-ah khan Yugoslavia lakah beiseina a sang lo thei lo - mahse an tel an phal lo miau si!

Ram pangaah player ṭhate ṭhen hran an ni a, heti chung hian an nep lo - France 98-ah khan Croatia team hmuhnawm tak chu pathumna an ni a, FR Yugoslavia-in last 16 an lut - Croatia team-ah hian tuna India coach Igor Stimac a tel. 

February 1, 2012 a ni a, Egyptian Premier League match-a Al Masry leh Al Ahly inkhelah buaina a chhuak - sorkar chuan Port Said Stadium-a buaina hi an chhui chiang a, league hi khelh chhunzawm zel chiah a ngai lo. 

Sorkar thutlukna hian club tam tak chu sum leh paiah na takin a nghawng dawn tih a lang reng. Mahse, sorkar chuan khelh luih chiah a ngai miau lo a, league tihtawp a ni. 

Egyptian Premier League tih tawp a nih lai hian mak takin club vantlang Haras El Hodood chu hmahruaitu an ni a, African Champions League nomawi kawltu ni lai Al Ahly aia match khata khel tlemin point khatin hma an hruai. 

Mahse, league tihtawp a nih miau avangin EPL-a a vawi khat nana champion tum Haras beiseina chu tihtawp a ni a, 2013-14 season a her chhuah hma chuan Egypt-a professional football chu tihtawp a ni. 

Catalan club ropui Barcelona chanchin sawi apianga hmaih theih loh chu Pep Guardiola hunlaia Barcelona team kha an ni. Kum 2008 nipuiah Pep hian Barca a enkawl ṭan a, Cruyff-a 'total football philosophy' chu innghah nana hmangin Lionel Messi, Andres Iniesta leh Xavi te an duhthalin an leu kual vel ṭhin. 

Pep-a enkawlna hnuaiah hian 2008-2011 inkarah a zawna league nomawi chawiin hattrick an siam a, 2008-09 season-ah phei chuan treble champion niin Champions League nomawi hi vawi hnih an chawi hman. 

Barca hian ti fuh chu ni se Champions League-ah pawh hian a zawna kum thum champion thei an ni - mahse 2009-10 Champions League semifinal-ah Inter Milan an ngam lo a, Barca hian puh tur zawng se khuarel chhiatna chu puh theih a ni. 

Iceland-a tlang kang rapthlak tak chuan Europe hmun hrang hrang a kang kai a, zin kawng thlengin a ti buai. Barcelona-in ni hnih ngawt bus-a chuang chungin Inter Milan khelmual an pan a ngai a, 3-1 in an tlawm. 

Second leg-ah Jose Mourinho-a thiam dan ber defensive game mawi tak hmangin Inter an khel a, 1-0 in Barca chak hram mahse first leg-a an result chu Inter Milan tan final luh nan a tawk - Inter-in 2-0 in Bayern Munich an hneh zui a, treble champion an ni.