City-in kum 16 mi lalut
Manchester City chuan kum 16 mi defender Kluiverth Aguilar chu Alianza Lima aṭanga lalut turin inremna an neihpui a, mahse Peruvian rawlthar hi kum 18 a tlin hma May 2021 thleng chu a club khelhna ngaiah hian a cham dawn a ni.
Peru Under 17 international hian nikum November khan sikul naupang nichungin Lima tan a match hmasa ber a khel ve chauh a, khawthlang media-te tarlan dan chuan a man hi pound maktaduai 1.5 vel niin City hian an hralh a nih chuan Alianza Lima hian share an nei ve ang.
Alianza chuan, "Tun hnaia Peruvian football-a Europe transfer thlenga hriatreng tlak tur a ni," tiin an player hralh chungchang hi an sawi a, Aguilar chuan, "First team-a plater pawimawh nih hi ka tum chu a ni," a ti.
Peruvian club lian Alianza Lima hian transfer langsar tak tak an lo nei tawh ṭhin - kum 2004 khan an forward Jefferson Farfan chu Dutch club ṭha PSV Eindhoven-ah an kaltir a, a hnuah Schalke 04, Al Jazira leh Lokomotiv Moscow tan a khel.
Peru footballer hlawhtling ber pawl tih ngam Claudio Pizarro chu 1999 khan Werder Bremen hnenah an hralh a, kum 41 mi a nih thlenga inkhelh la chawlhsan lo striker hian Bayern Munich leh Chelsea tan hial a khel zui a ni.