Ramhlun N-in I League club an hneh
Mizoram Premier League kai-thar Ramhlun North-in Nigerian forward Onyeama Francis Okechu-kinu goal hmangin Aizawl FC 1-0 in an hneh. MPL-a Lalruatliana Sailo (Tawia) hoten I League club an phak lohna hi point thum chiah a ni ta.
Ningani zanah inkhel a hmuh-nawm a, amaehrawhchu chhum zin vangin zan lamah first half bak khelh a ni lo. Nimin tlai khan second half khelh a ni a, Aizawl FC-in zan lama an goal phurh sut tum mah se man of the match-a thlan Ramhlun North keeper Liansangpuia chet ṭhat ni an tawn avangin goal an khung thei lo.
Foreigner nei ve ve
Ramhlun North-in an foreigner lakluh thar Onyeama Francis Okechukinu chu training la zawm lo mah se Aizawl FC hmachhawn turin an dah lut nghal.
Aizawl FC-in Nigerian interna-tional tia an sawi midfielder Ben-jamin Onome an chhawr ngam lo zel a, Ghanaian forward Bright Middleton Mends erawhin bul a ṭan thung. Inhliam vangin Lalram-chullova a khel lo.
Zanah Francis
Ramhlun North-in risk an lakna Nigerian forward Francis-a'n minute 14-na lekah Zosangliana (Chhaia) ball vawrh luh chu harsatna nei loin a tuah lut a, hei hi Ningani zana goal awm chhun a ni.
MPL kai-thar-in goal an khung chhanah hian AFC defender Jona-than Lalrawngbawla leh keeper Zo-than-mawia ten mawh an phur niin a lang.
Aizawl FC erawhin ṭum dang ang thoin ball an chang tam (60%) a, amaherawhchu Tawia'n awmze neia player a rem miau avangin I League club-in chance ṭha bik an nei lo. Ghanaian forward Bright-a'n keeper chauh hmachhawn ṭum nei mah se Ramhlun North keeper Liansangpuia'n a dansak.
Chhum vanga buaina
First half tawp nana minute thum a la awm tihin chhum zin vangin darkar chanve chuang chawlh a ni a, first half khelh zawh hram a ni.
Half time-a chawlh hnuah pawh chhum a kiang thei lo a, second half hi nimin tlaia khelh turin an rel ta.
Sangpuia Show
Darkar 17 hnuah second half khelh a ni a, goal mamawh Aizawl FC-in Albert Zohmingmawia luhtir nghalin an si phurh sut an tum hle.
Zan lama goal khungtu Nigerian forward Francis-a tlai lamah pawh a ṭha tho. Aizawl FC-in goal khung theihna hun ṭha an nei nual a, freekick aṭangin chance ṭha vawi li an nei - Ramhlun North keeper-in a dang ṭha ṭhin hle.
Ruahsur nasat avangin AFC keeper T. Mawia'n a pet sual a, Lammuala tui tlin vangin Nigerian forward Francis-a'n a hmang ṭang-kai thei lo.
Hun tawp lamah Ramhlun North talbuai mah se Aizawl FC-in goal khung thei player an neih loh avangin I League club-in point an hmu zo lo.
Aizawl FC hian tun season-ah Chhinga Veng, Zo United leh Ramhlun North lamah (Round 2 -ah zawk) chiah goal an la khung thei - an goal bawh a na tawk lo.
Eng nge an sawi?
Aizawl FC coach Mala chuan, "Chhum zing leh ruahsur vangin chhuanlam siam ka tum lo. Kan khingpuite pawhin kan harsatna tawh ang tho hi an tawk a, kan buaina zawk chu goal khung a ni. Result ṭha zawk nei turin tlarhma lam kan ṭan a ṭul a ni," tiin Vanglaini palai a hrilh.
Ramhlun North coach Tawia chuan, "Goal kan khung vangin kan vannei zawk a ni. Point 10 kan hmu ta a, semifinal kawng a la inhawng tih kan hriat avangin knockout stage lut turin theihtawp kan chhuah ang," tiin a sang pali zinga tel ngei a tum thu a sawi.
ZoFooty Statistics
Ramhlun North 1 - 0 Aizawl FC
RNFC : Onyeama Francis Okechukinu
MoM: Liansangpuia, RNFC
37% Ball Possession 63%
9 Shots 14
4 On Target 9
3 Yellow Cards 0
0 Red Cards 0
Powered By Rainbow Multibrand
Mobile Showroom
Team Dinhmun
# Team Pld W D L GF GA GD Pts
1 Bethlehem VT 9 6 1 2 9 7 2 19
2 Chanmari FC 8 5 2 1 16 7 9 17
3 Chanmari West 9 5 1 3 13 8 5 16
4 Aizawl FC 9 4 1 4 8 6 2 13
5 Ramhlun North 9 3 1 5 9 13 -4 10
6 Chhinga Veng 9 2 2 5 12 14 -2 8
7 Dinthar FC 8 1 4 3 8 13 -5 7
8 Zo United 9 1 4 4 4 11 -7 7
Tute nge inlan?
Ramhlun North FC (4-4-2) : Liansangpuia; Lalmalsawma (Lalchhuanpuia 46'), Lalramthlamuana, C. Ramdinmawia, Lalmuanawma (Lalruatfela 65'); Isaac Lalruatpuia, Lalruatkima Dosel, Zosangliana, Jerry F. Zonunsanga (David Lalrinchhana 56'); Onyeama Francis Okechukinu, B. Malsawmzuala.
Aizawl FC (4-1-2-3) : Zothanmawia; Ricky Lallawmawma, Jonathan Lahriatkima, Lalrinzuala Khiangte, Lallawmzuala; Rohmingthanga, Zoramthara (Lalbiakthanga 82'); Vanlalduatsanga, Bright Middleton Mends, Brandon VL Remdika; F. Lalremsanga (Albert Zohmingmawia 46')