Chhinga Veng an harh chhuak

Chhinga Veng FC-in nimin tlai 'relegation battle'-ah Zo United 3-0 in an hneh a, MPL kaitharin table mawngphah chhuahsanin Remlal-thlamuanpuia (Sabito) hote a hnuai berah an tla thla thung.

Chawngthansanga hoten a zawna match li chhung an chak loh hnua hnehna an chang theih nan Vanlallawma'n goal hnih a khung bakah H. Lalmuankima'n goal khat a khung ve bawk. Zo United erawh coach thar hnuaia an match hnih khelh tawhah an la chak lo ve ve.

Dawngtea telin

Chhinga Veng FC-in an striker langsar MS Dawngliana inkhel bul an ṭantir a, Bawngkawn tlangval hi tlarhmaah Kelkang tlangval Lalkhaw-puimawia nen an inkawp. Coach Chawngthansanga
erawh Champhaia a chet mawi loh vangin technical area-ah a ṭhu thei lo thung.

Zo United-in coach thar Sabito hnuaiah 3-4-3 formation bawk an hmang a, coach hmasa Vanlalrova hnuaia full back-a awm ṭhin Vanlalruata chu midfield-ah tawnhriat ngah zawk H. Malsawm-tluanga aiah dah luh a ni.

Chhinga Veng thar

MPL kaithar Chhinga Vengin ṭan phat aṭangin an nawr nghal a, tlarhnung lamah Nigerian defender Emma Chigozie a khelh ṭhat bawk avangin Zo United tlarhmate dan chahin an awm.

Dawngtea awmna Chhinga
Veng team a danglam a, minute 20-na lekah Kelkang tlangval Mapuia chu inhliam vangin lakchhuah ngai mah se MPL kaithar an buai phah lo.

Khawzawl tlangval Lawma'n a hun ṭha neih goal ban pet per nana a hman hnuah keeper LK Hmangaihzuala tihsual vangin minute 33-naah goal a khung tho.

Minute thum hnuah Lawma
ball vawrhluh chu MK-a'n nalh takin a tauh lut a, second half-ah Chhinga Veng tan Lawma'n chak chianna goal a khung leh bawk. Zo United-in goal zawnah vawi khat chiah an pet a, goal an khung loh avangin point an hmu lo.

Eng nge an sawi?

Chhinga Veng assistant coach Lalrinnunga chuang, "Coach (Chawnga) awm lo mah se thutlukna hi coaching staff ten kan inrawn khawm hnuah kan siam a. Result ṭha kan neih loh avangin player-te kan infuih ṭha a, kan insiksawi bawk. Semifinal chu kan sawi ngam tawh rih lo a, relegate lo tur chuan theihtawp kan chhuah ang," tiin inkhelh banah a sawi.

Zo United coach Sabito chuan, "Kan defender ten kan keeper an ring tawk loh avangin kan game-in a tuar a, kan chak lohna chhan pakhat a ni. Player ka lak belh a nih chuan goalkeeper kan la lut ang," tiin goal thum an chhuah chhan a sawi.

Tute nge inlan?

Chhinga Veng (4-4-2) : R. Lalhmangaihzuala; R. Laldinliana, K. Lalthlahlova, Emmanuel Chigozie, Dinthangpuia; H. Lalmuankima, Joy Mrona Khar Raswai, Vanlalthanga, Vanlallawma; Lalkhawpuimawia (PC Vanlalhmangaihzuala 20'), MS Dawngliana (Isaac Lalremruata 80')

Zo United (3-4-3) : LK Lalhmangaihzuala; Lalnunpuia Pachuau, Malsawma Chhangte, Hmingthanzauva; Vanlalhmangaiha, C. Laldinmawia, Vanlalruata (H. Malsawmtluanga 56'), Vanlalremsanga (R. Lalthantluanga 66'); Laldinliana Varte, Isak Vanlalpeka (Lalhlimpuia 70'), Lalnunsanga.

ZoFooty Statistics

Chhinga Veng FC 3 - 0 Zo United

CVFC : Vanlallawma 33', 78'; H. Lalmuankima 36'

MoM : H. Lalmuankima, CVFC

48% Ball Possession 52%

21 Shots 7

12 On Target 1

2 Yellow Cards 1

0 Red Cards 0

Powered By Rainbow Multibrand

Mobile Showroom