Champion turin Liverpool an tha tawk - Sir Alex

Manchester United coach ropui chawl ta Sir Alex Fer-guson chuan Jurgen Klopp-a enkawl Liverpool chu Premier League champion tura an ṭhat tawk thu a sawi - Reds hian zanin dar 10:00-ah Crystal Palace an lenchilh dawn.

Zanin Premier League-ah club langsar an inlan nual dawn. Champion thei zinga sawi hmaih thiang lo Tottenham Hotspur chuan dar 7:30-ah Leicester City an mikhual ang a, dar 7:30-ah vek hian Manchester City chuan khualmualah West Brom an lenchilh dawn bawk. Premier League club lian zingah Chelsea chu Pathianni zanah an inlan dawn a, zan dar 9:30-ah Southampton an luhkhung ang.

Liverpool ringtu Alex

Reds-in league match vawi kua an khelh tawhah team ṭha Arsenal, Tottenham, Chelsea leh Manchester United bakah champion lai Leicester an hmachhawn tawh a, chak loh an nei lo. United boss hlui Sir Alex pawhin Reds chet ṭhat a hai lo, "Liverpool hian hun engemaw chen chu an nihna tak phaw chhuak thei siloin manager an thlak reng a, tunah erawh hmana Liverpool ang kha kan hmu leh ṭan tawh avangin nomawi an chawi thei ang," tiin a sawi.

Crystal Palace manager Alan Pardew pawhin an hmachhawn tur team a hrechiang a, "Liverpool chet ṭhat lai tawnfuh chuan engkim a harsa ṭhin," tiin a sawi. Pardew chuan Reds aṭanga an lakluh striker Christian Benteke chuan Liverpool hi a hmachhawn tur thu a sawi bawk.

Team talbuai City?

Manchester City-in match ruk chhung hnehna an chang tawh lo a, an league match hnuhnung bera Southampton nen an inhnehtawk hnuah EFL Cup aṭangin United-in an pet chhuak bawk. Saints nen an in draw ṭumin inkhelh zawhah Pep-a'n a naute darkar khat zet dressing room-ah a awm khawtlai tir a, Spanish manager chuan, "Kan dinhmun ṭha lo tak chungchang kan sawi ho a ni," a ti a, Barcelona boss hlui hi a mangang tawh tih hai rual a ni lo - zaninah mahni khelmual hmang thiam West Brom an luhkhung dawn.

Baggies boss Tony Pulis-a'n kum 2013 thleng West Brom enkawl turin contract thar a ziak a, a thusawi hmasa ber chu, "10-na dinhmun tal luah kan tum ang," tih a ni. He dinhmun luah tur hian mahni khelmuala tlawm an duh lo ang.

Spurs hmaah Foxes

Tottenham Hotspur-in EFL Cup-ah Liverpool hneh loin beisei tur an nei tawh lo a, zaninah Premier League champion Leicester mikhualin an league zinkawng an ṭan lehnghal ang. Hrem vanga Moussa Sissoko chhawr theu lo tur Spurs tan White Hart Lane-ah Foxes hi awlsam taka hneh chi erawh an ni dawn lo - Ballon d´Or dawng thei tura hming chhawp chhuah 30 zinga tel thei Jamie Vardy leh Riyad Mahrez neitu an ni tlat.

Leicester boss Claudio Ranieri chuan, "Mahrez leh Vardy hian Ballon d´Or an dawng thei ang em ka hre lo a, an thlen chin erawh a ropui thlawt, " tiin a player pahnih a fak a, player pahnih hi inkhel thlak danglam thei tur khawpin an ṭha tawk.

Blues thar?

Chelsea-in United an sawp hnu lawkah EFL Cup an khel a, team tenau zawk West Ham hneh loin an mualpho. Chelsea manager thar Antonio Conte-a'n United an hneh hnu lawkah, "Kan duh ber chu tum kan nei a ni tih pholana, kan fan-te lungawina pek hi a ni a, manager tana pawimawh ber chu kan chak lohna lai insiamṭhat dan ngaihtuah chhuah hi a ni bawk," tiin a sawi a, Hammers an hneh loh hnuah insiamṭhat dan a hriat leh hriat loh Pathianni zanah a hriat ang.

Conte tan a hna erawh a awlsam dawn lo - Saints in an league match hnuhnung pangaah vawi li chakin vawi khat an khingpui an draw a, an team inhnehtawkpui lah City an ni. Zanina Chelsea an mikhual hunah pawh Claude Puel-a naute hian mikhual lakah ṭhat chhuah an tum dawn lo.