Arsenal tan point 3 hmuh hun

Vawiin tlai dar 5:00 hian Arsenal chu Sun-derland khelmual Stadium of light-ah an lenglut dawn a, season kal mekah Gunners hi khel
ṭha tluang berte zinga mi an nih laiin Black Cats erawh table mawngphaha awm an ni thung.

Arsenal hian tun din-hmunah chuan kum danga an buaina tlarhnung phui lo kha an siam ṭha rih niin a lang. Shkodran Mustafi leh Laurent Koscielny te bakah Hector Bellerin a rintlak a, an match hnu-hnung 14-ah vawi riat zet goal an chhuah lo. Wenger-a naute hian an match hnuhnung 14-ah chak loh an nei lo, league match kua an khelh tawh aṭanga point 20 hmuin pahnihna an ni mek - an boruak ṭhat vanglai a ni.

Hetihlai hian David Moyes-a kaihhruai Sun-derland hi Premier League season kal meka hneh la nei lo awmchhun an ni a, an league match hnuhnung pakuaah vawi sarih zet an chak lo - first team player Sebastian Larsson, Fabio Borini, Jan Kirchhoff, Vito Mannone, Adnan Januzaj, Jason Denayer leh Lee Cattermole te chu hliam vanga an chan mek avangin Arsenal laka point hmu tur chuan an thawhrim a ngai dawn.

Gunners tan striker Olivier Giroud a dam tawh a, midfielder Aaron Ramsey leh Santi Cazorla te dinhmun a la chiang lo thung. Tun season-a goal riat khung tawh Theo Walcott bakah Alexis Sanchez te an dam ṭha a, an league match hnuhnung bera Middlesbrough laka goal khung lo team hian Manchester City leh Li-verpool te elphak zel tur chuan goal an khung a ṭul tawh thung ang.