Manchester United khingpui tur Burnley

Manchester Derby-ah Jose Mou-rinho hoten Juan Mata goal hmangin Manchester City 1-0 in an hneh a, amaherawhchu English League Cup a nih avangin Pep Guardiola-a'n sa huai a ser lo tih a hriat a ṭha.

Zanin hian United-in Old Traf-ford-ah Burnley an mikhual dawn a, Premier league a nih avangin chak zawk a chiang lo. Red Devils-in champion lai Leicester City 4-1 an hneh hnuah Stoke City leh Liverpool draw lehin an match hnuhnung bera Chelsea-in 4-0 in an sawp thung. Mourinho hoten match hnuhnung paruka point 18 hmuh theihah point nga chiah an hlawh chhuak.

Burnley-in an match hnuhnung berah season bul ṭan ṭha Everton an hneh thei a, United angin EFL Cup leh Europa League khelh tur an neih loh bawk avangin player-te hahdamna hun ṭha an nei bawk. Arsenal tana harsatna thlen theitu Clarets hian United hneh loh Watford an hneh thei a, Old Trafford-ah point hmuh ngei an tum ang.

Mourinho chuan Chelsea laka an mualpho ṭumin United ṭantute hnenah ngaihdam a dil a, supporter tih lawm nan EFL Cup-ah City a pet chhuak nghal bawk. Portuguese manager hi a talbuai deuh tawh nge an match khelh apiangin player neih ṭhat a luhtir zel a, Burnley hmachhawn tur pawh hian khawvel footballer manto ber Paul Pogba pawh a inlan leh ngei beisei a ni.

United-ah French midfielder Pogba hian a ṭhat dan ber a la pho chhuak lo a, Spanish midfielder Juan Mata erawhin a thiam a la theihngilh lo tih a lang chho zel. Portuguese manager player thlan turin ngaihven a hlawh a, Henrikh Mkhitaryan chu EFL Cup-a City an hneh ṭumin squad-ah pawh dah a ni lo a, Burnley khelh hunah Borussia Dortmund midfielder hlui hian ngaihven a hlawh nawn leh ang.