Simon lakah Murray a chungnung

Andy Murray chuan a vawi 16 nana Gilles Simon hnehin Erste Bank Open quarterfinal a lut, Britain tlangval hian semi-final lut tur chuan John Isner a paltlang leh a ṭul ang.

Vienna-a inkhelah Rio Olympic leh Wimbledon champion Murray a khel ṭha tawk lo a, vawi 58 zet unforced errors nei chungin French tlangval lakah hian darkar hnih leh minute 40 chhungin 4-6, 6-2, 6-2 in hnehna a chang.

Kum 29-a upa Murray hian a zawnin match 12 chhung hnehna a chang tawh a, tun ṭumah hian a champion a nih chuan world number 1 Novak Djokovic a hnaih chho zel dawn. Serbian tlangval tan a dinhmun humhim zel tur chuan karleha khelh tur Paris Masters-ah a chet ṭhat a ṭul dawn.

Inkhel dangah seeded pawh chang phak lo Viktor Troicki chuan David Goffin lakah 6-2, 7-5 in hnehna a chang ve bawk. He inkhel result avang hian Goffin tan kumin chhungin world ranking-ah Gael Monfils lehpelh theih a ni tawh lo.

France tlangval Monfils hian Djokovic, Murray, Stan Wawrinka, Milos Raonic leh Kei Nishikori te hnungzuiin November 13-20 chhunga khelh tur ATP Finals atan hmun a chang chiang tawh. World ranking-a a sang pariat ten an khelh
ṭhin he inelnaa tel tur hian hmunruak pahnih a la awm tihna a ni ang.