La Liga Season dang zawng aiin a ngaihnawm
Zaninah La Liga nomawi beisei ṭhiau Real Madrid, Atletico Madrid leh Barcelona an inlan dawn a, Spanish club lian pathum hi zanin inkhel result a zira table chung ber luah thei vek an nih avangin an inkhel tur hian ngaihven a hlawh zual hle. Season dangah chuan La Liga hi Real Madrid, Barcelona leh Atletico inelna bikah ngaih a ni a, tun season-ah erawh engkim a danglam ta.
Hmahruaitu Real Madrid meuh pawhin team pathum an draw tawh a, Barcelona-in vawi kua lek league match an hmachhawn tawhah vawi hnih hnehna an chang lo der tawh hi season dang ngaihtuah chuan a mak a, Atletico lahin vawi nga chiah hnehna la changin pangana an ni mek - hetichung hian hmahruaitu Real leh pangana Atletico inthlauhna hi point thum chauh a ni.
Spanish club lian pathum inkarah Copa America-a Chile champion pui thei coach Jorge Sampaoli enkawlna hnuaia khel ṭha tak Sevilla leh Villarreal an awm a, hei hian a hrilhfiah chiang tak chu La Liga-ah team an intiat tawk tawh tih hi a ni. Real-in an hmahruaina chhawm nung zel turin zanin dar 7:45-ah Alaves an lenchilh dawn a, Atletico Madrid-in dar 10:00-ah Malaga an mikhual ang a, dar 12:15-ah Barcelona chuan Granada an mikhual bawk ang.
Phur thar Real
Real Madrid-in match li zet an khingpui a zawna an inhnehtawkpui hnuah harh-tharna an chang a, an match hnuhnung paliah goal 20 zet khungin goal li chiah an chhuah! Zinedine Zidane-a enkawl team hian Alaves an lenchilh hma an match hnuhnung berah Spanish Cup khelin third division club Cultural Leonesa chu 7-1 in an sawp a, goal khung an uar vanglai taka Real mikhual hi Alaves tlarhnungte ṭawngṭaina a ni lo tawp ang.
Sergio Ramos-a'n ram tan a fehchhuahna lamah hliam a tuar avangin November 19-a Madrid derby-ah a lo kir theih chauh beisei a ni a, hetichung hian club captain hian training a zawm leh tawh. Real tan an captain-in training a zawm leh tawh ringawt pawh hi phurna tham a ni.
Real Madrid-in match 24 chhung chu inelna hrang hrangah hneh loh an tawng tawh lo a, coach Zidane erawh a chapo duh lo. French manager chuan, "Tunah hian eng nomawi mah kan la chawi lo a, tuna kan khelh ang pata kan khelh reng a ngai a ni," tiin chawl hman an la nih loh thu a sawi.
Oblak a dam
Atletico Madrid keeper Jan Oblak chuan hliam vanga Nilainia club training a zawm loh hnuah nimin khan a training lai hmuh leh a ni tawh a, Slovenia international hian nilenga training pangngai a neih theih avangin zanina Malaga an hmachhawn hunah inlan thei tura beisei a ni.
Thawhṭannia La Liga award semnaah chawimawina awm thei zawng zawng deuh thawh Atletico-in an hui a, Diego Simeone chu Coach of the Year-a thlan niin Best Player-ah Antoine Griezmann, Best defender-ah Diego Godin, Best goalkeeper-ah Oblak te thlan an ni a, Atletico hi team ṭha an ni tih hai rual a ni lo.
Mahse, Atletico Madrid hian an match hnuhnung berah Sevilla chu khualmualah 1-0 in an hneh lo a, zanina Malaga an mikhual hunah award dawn kha an phu ngei a ni tih an lantir a ṭul ang - Malaga-in Atletico chak lo thinrim an tawng dawn nge, an hnual lai takin an hneh chhunzawm dawn tih chu zaninah a hriat ang.
Award aiah hnehna
La Liga award sem a nih ṭumin coach of the year ni tura beisei Luis Enrique aiah Atletico Madrid coach Diego Simeone-a'n chawimawina a dawng a, award semnaah Enrique hmel hmuh tur a awm lo bawk.
Barcelona boss chuan, "Sawm ka nih loh vanga kal lo ka ni a, hetiang award semna tih vela kal hi ka ching lo tih chu inhriat hnu vek a ni bawk. Engpawhnise ka tana pawimawh ber chu award ni loin Spanish football-in hma a sawn theihna tur hi a ni. La Liga coach ṭha 20 zingah erawh ka tel chiang e," tiin fiamthu a thawh zui.
Zanina inkhelah award ngai pawimawh lo coach hian Granada a mikhual dawn a, coach ṭha a nih tih lantir tur chuan hnehna a chan a ngai ang. Celta Vigo laka 4-3 a an mualpho hnu lawkah Catalan club hian Deportivo leh Manchester City lakah 4-0 ve ve in hnehna an chang leh tawh a, an match hnuhnung berah Valencia chu injury time-a Messi penalty hmangin 3-2 in an hneh thung.