Bayern-in Lewandowski chelh zel an duh

Bayern Munich chairman Karl-Heinz Rummenigge chuan Robert Lewandowski chuan contract thar la ziak chiah lo mah se Poland captain hian German champion tan hian kum hnih daih tal contract thar a ziah belh a beisei thu a sawi.

Tunkar khan Lewandow-ski-a agent Maik Barthel chuan a player hian Bayern tan contract a la ziah thar loh thu leh inremna an la neih loh thu a lo sawi tawh a, hei vang hian Rummenigge hi a rawn
ṭawng chhuak ve nia ngaih a ni.

Rummenigge chuan, "Tluang takin thil a kal zel a, inbiakna pawh kan nei tawh ngei. Chutihrualin inremna erawh kan la ziak lo ngei mai, kan hnenah hian kum hnih dang tal cham tura a rinawmna a tihlan ngei ka ring," tiin a sawi.

Kum 28-a upa Lewandowski hian Borussia Dortmund
aṭangin kum 2014 khan Bayern hi zawmin kum 2019 June thla thleng contract a nei mek. Tun season-ah a club tan inelna hrang hrangah match 13 a khelh aṭanga goal 10 khung tawhin Europe-a striker hriam berte zinga mi a ni mek - Real Madrid chuan an ngaihven nia sawi thawm a awm avangin Bayern tan an player pawimawh chelh tuma hmalak hunlai a ni.

Bundesliga champion nomawi kawltu Bayern Munich hian Carlo Ancelotti hnuaiah season bul an ṭan fuh chho viau a, league hmahruaitu ni mekin zanin dar 7:00 hian FC Augsburg khelmualah an lenglut ang.