Delhi leh Pune inhnehtawk

Ningani zan khan Jawaharlal Nehru Stadium, Delhi-ah Delhi Dynamos chuan Pune City an mikhual a, minute 79-naa Milan Singh goal khung hmangin an mikhual hi 1-1 in an inhnehtawkpui.

Mikhual team Pune tan La Masia chhuak Jesus Tato chuan chawlhlawk hman a nih hma lawkin goal hmahruai a khung a, Pune tan keeper Edel Bete a chet ṭhat avangin Delhi-in an si phurh sut lawk thei lo mah se minute 11 chiah a awm tawh tiha Milan Singh goal hmangin an si phurh an sut ta hram a ni.

Delhi Dynamos tan a match hnuhnung bera penalty chawitu Lalchhawnkima'n a chet fuh loh a tuar a, Aizawl FC defender hian a vawi khat nan tun season ISL-ah a hmel a lan lo. Lalruatthara'n Gianluca Zambrotta enkawlna hnuaiah hmun a la chang lo zel a, Pune defender Zodingliana Tochhawng pawhin bench lamah hun a hmang tluan.

Delhi Dynamos FC head coach Gianluca Zambrotta chuan, "Kan match hnuhnung bera Atletico de Kolkata kan hneh loh hnuah kan fimkhur em em a, zanin inkhel kha in thlirkir chuan kan thunun tih in hmu thei ang. Vawi tam hun ṭha kan nei chungin goal kan khung thei tlat lo a, a chang chuan chak tur chuan vanneihna kan mamawh ve ṭhin bawk a ni," tiin an chak loh chu an vanduai vangah a ngai.

Mimal Lawmman

Emerging Player of the Match Milan Singh, Delhi Dynamos

Hero of the Match Edel Bete, Pune City

Zanin Inkhel Tur

Chennaiyin FC 07:00 PM Kerala Blasters

Pathianni Zan, October 30

FC Goa 07:00 PM Delhi Dynamos