Rosberg tan nomawi a hnai

Pathianni zan dar 12:30 hian Formula 1 Mexican Grand Prix tlan a ni dawn a, driver championship-a hma-hruai mektu Nico Rosberg tan nomawi chawi theihna hun a awm thei dawn.

Mercedes driver Rosberg hian intlansiak 18 an neih tawh aṭanga point 331 hmuin a teammate Lewis Hamilton lakah point 27-in hma a hruai fal mek. Kuminah tlan hmabak pathum chiah a awm tawh a, Mexico-ah hian Rosberg hi pakhatna niin Britain driver Hamilton-a'n point a hmu lo a nih chuan German driver hi world champion a ni ang.

Kum 31-a upa Rosberg hian tun season-ah vawi kua hnehna a chang tawh a, heti chung hian chetsual theih a la nih zia a hai lo, "Ka tan champion nih theihna kawng a awm tih ka hria, chutihrualin a pawimawh ber chu intlansiak vawi khat atan vawi khat hnehna chan a tawk, tam tak ngaihtuah hun a la ni lo," tiin a ṭawng fiimkhur hle.

World champoion vawi thum ni tawh Hamilton chuan, "Tun season-ah ṭha takin ka tlan reng thei lo a, khawl lam fel loh vang leh mimal ṭhat tawk lohna vangin ka dinhmun a him lo. Chutihrual erawh chuan a tawp kan thlen hma chuan kei chu ka beidawng ve ngai lo," tiin a sawi.