Match 22 tlawm lo zawn thei PSG

Paris St-Germain chuan inelna hrang hranga an match hnuhnung 22 zetah chak loh an nei lo, French champion hian Nilaini zan khan Dijon chu 6-1 zeta sawpin French Cup semifinal an inhlangkai.

PSG hi season hmasa khan French Cup final-ah Rennes hneh loin an tlawm a, season li chhung nomawi an chawi tawh an hloh - kuminah erawh champion leh an tum hle.

Quarterfinal inkhel dangah champion lai Rennes hian fourth division club ASM Beltfort chu 3-0 in an hneh tawh a, team intiattawk tak inkhelah Lyon chuan Marseille 1-0 in an hneh thung; nizan khan SAS Espinal leh Saint-Etienne te inkhel lehin result kan hre hman lo.

Dijon khelmuala inkhelah mualneitu lam an che fuh lo, second 47-na lekah Wesley Lautoa chuan anmahni lamah a ti lut. Mahse, rin loh tak maiin minute 13-naah Mounir Chouiar hmanga an si phurh sutin an dinhmun an siamṭha.

Amaherawhchu, player ṭha awmkhawm PSG dan reng theih an ni lo, striker Edinson Cavani-a goal khung chu VAR hmanga hnawl ni mah se chawlhlawk hmain Kylian Mbappe-a'n hmahruaina goal a khung.

Defender Thiago Silva bakah Pablo Sarabia chuan goal hnih khung belhin, Dijon defender Senou Coulibaly-a'n anmahni lama a tih luh leh avangin anmahni mualah an mualpho; chutihrualin an hneh loh hi Ligue 1 roreltu an nih avangin dem theih an ni lo.

PSG tan Neymar chu match hnih chhung a inlan thei ta lo, Brazilian forward hi a nakruh na vangin a chawl mek. Manager Thomas Tuchel chuan February 19-a Borussia Dortmund nen an inkhelh hun atan pawh a dinhmun a chiang lo tih a sawi.

Tuchel chuan, "Dortmund a hmachhawn ngei ang tih ka sawi thei lo, a dinhmun dik tak hi kan sawiho leh hmasak phawt a ngai dawn. Inrinni zana Amines nen kan inkhelh hun atan chuan a inlan theih a rinawm loh.

"Nitin a dinhmun endik zel a ni a, damchiang lo chunga chhawr luih chu club leh player tan a ṭha lo," a ti. PSG hian Ligue 1 lamah fal takin hma an hruai mek a, an nomawi pawh an hum leh ngei a rinawm - Inrinni zan dar 10:00 hian Amiens nen an inhmachhawn leh ang.