4-0 Mualphona thlentu 4-0 Phurna siamtu Manchester City Vs Barcelona

Pep Guardiola-a'n Argentine forward Sergio Aguero bul a ṭantir loh ṭumin Nou Camp-ah Barcelona 4-0 zetin an hneh lo. Inrinni zanah erawh Aguero-a'n bul ṭanin The Hawthorns-ah mualneitu West Brom 4-0 zetin an sawp a, Manchester City tan Barcelona hmachhawn hmaa goal li zeta chak aia inpuahchahna ṭha a awm chuang lo.

Zanin dar 1:15 hian Etihad Stadium-ah City-in Barcelona an mikhual dawn a, Pep Guardiola-a'n Aguero-a khelh dan tur sawi si loin Argentine forward-in bul a ṭan tur thu a sawi. Catalan club-in captain Andres Iniesta an chhawr thei dawn lo a, Luis Enrique-a tan City hneh zawn hi hna hautak a ni dawn.

Thim aṭangin êng

Manchester City-in a zawnin match ruk chhung chak hmel an hmu lo a, hei hi Pep Guardiola-a'n manager hna a chelh hnua chak nei loa match a khelh rei ber ṭum a ni.

Hun harsa paltlang nan Sergio Aguero leh Ilkay Gundogan ten goal hnih ve ve Baggies lamah khungin Pep-a kaihhruai City-in chak hmel an hmu leh ta. Premier League hmahruaitu City hian Barcelona an hneh loh ṭumin team ṭha lo zawk an nih an pawm a ṭul a, chutihrualin EFL Cup aṭanga an tlak chhan erawh Manchester United an ngainep lam ni loin a inelna an ngaih pawimawh tawk loh vanga chak loah an ngaih theih thung.

United an hmachhawn ṭuma player pawimawh ṭhenkhat an awltir zarah league-ah an result ṭha an nei a, amaherawhchu zanina Barcelona lakah point an hlawh chhuak leh si loh a nih chuan awmzia nei loin EFL Cup an thlah liamah a ngaih theih ang. Pep hian Catalan club a chhuahsan hnuin Nou Camp hi vawi hnih a tlawh tawh a, Bayern Munich leh City a chak loh pui ve ve. Spanish manager hian Allianz Arena-ah erawh Barcelona hi a hneh a, Champions League final erawh a thleng pha chuang lo.

City boss Pep chuan, "Ague-ro hi kan mamawh takzet a, khelmual chhunga a theihna hmuh hian player danglam bik tih a chiang a ni. Tun aia player ṭha zawka chher hi ka tum ang," tiin Argentine forward chu English club-ah a ngheh thu a sawi.

City-in West Brom an hneh
ṭum khan Aguero hian goal hnih a khung ringawt lo a, 10.2km zet a tlan. Season liam taa chawhruala 8km tlan Argentine forward hian Pep-a hnuaiah harhtharna a chang mek. Aguero leh Kevin de Bruyne te hi 2016 Ballon d'Or shortlist-ah tel an ni a, hetiang dinhmun ding thei tura theihna nei Gundogan an kawl bawk avangin City hi Barca lakah dah hniam ngawt a thiang lo.

Barca lam

Barcelona-in kartawpah Granada 1-0 in an hneh a; Lionel Messi, Luis Suarez leh Neymar te goal khung loh ṭum hian Rafinha-a'n goal a khung. MSN-in goal khung lo mah se City nena an intawn hnuhnun bera Messi thiam zia, Suarez-a'n a kawppuite thlawp ṭhat zia leh Neymar theihna san zia te a lan chian avangin Pep-a'n a veng uluk ang tih a chiang.

City tana thu lawmawm erawh Ineista bakah Gerard Pique leh Jordi Alba te inhliam vangin an khel thei dawn lo a, Jeremy Mathieu lah hrem a ni bawk. Catalan club hian City-in sira an hnawl tawh Denis Suarez chu Iniesta thlak turin an dahluh rin a ni a, Spanish midfielder hi Champions League-ah la inlan lo mah se league match a khelh dan aṭangin amah duh lotute a inchhirtir theih ngei a rinawm.

Barcelona coach Luis Enri-que chuan, "Manchester City kan hmachhawn hunah chuan pressure ṭha takin kan pe ang a, City player pakhat pawh hmun awl siam kan tum lo ang. Kan tihsual erawh chuan kan khingpuite hi min hrem thei turin an ṭha tawk," tiin an khelh dan tur hmang a sawi lang.

Engtin zel?

Barcelona-in point kua an hmu tawh a, knockout stage lut chiangah an ngaih theih. City erawh pahnihna dinhmun luah mah se point li chiah an hmuh avangin Catalan club an hneh lo a nih chuan an dinhmun a derthawng khawp ang.

Group C inkhel dangah Borus-sia Monchengladbach-in Scottish club Celtic (1 Pt) an mikual dawn a, German club Gladbach hian point thum an hmuh tawh avangin Brendan Rogers hote hi an hneh nawn thei a nih chuan City hmabak a harsa sawt ang.