Arsenal zin chhuak dawn

Champions League group match khel turin Arsenal chuan zanin dar 1:15 hian Ludogorets an lenchilh dawn. Gunners hian karhmasa khan Bulgarian club hi 6-0 ngawta an lo sawp tawh avangin inrintawkna sang tak nen an zin chhuak dawn tih a chiang.

Arsene Wenger-a'n October leh November thla hi an tan hun pawi-mawh a nih thu a lo sawi tawh a, Ludogorets an hmachhawn zawh hian Premier League lamah Tottenham leh Manchester United an hmachhawn zui dawn bawk avangin French mana-ger hian a player ṭha ṭhenkhat a hah-chawlhtir a nih pawhin a mak lo ang.

League lama hrem tuar mek midfielder Granit Xhaka a chhawr theih dawn a, thla hnih dawn a inkhelh loh hnua dam hlim Aaron Ramsey a rintlak leh tawh - striker Olivier Giroud-a'n goal hnih hmangin a dam thu a puangzar tawh bawk.

Wenger chuan, "Player pakhat tan inkhel zawng zawnga inlan vek theih a ni lo a, kei chuan kan ṭhat theih dan ber turin team ka remkhawm ṭhin. Inkhel bul ṭan tur ka la sawi chiang thei lo a, hnehna chan tumin kan zin chhuak ang tih erawh ka chiang," tiin a sawi.

Arsenal hi inelna hrang hranga an match hnuhnung 14-ah chak loh nei loin an kaltluang mek a, heng zinga an match hnuhnung pakuah vawi sarih zet chu goal an chhuah lo - an boruak ṭhat vanglai a ni. Captain Per Mertesacker chu a khup na vangin Champions League group stage squad-ah telh a ni lo a, striker Danny Welbeck pawh kumin chhungin an chhawr theih a beiseiawm loh thung.