Real Madrid-ah Bale a nghet

Real Madrid forward Gareth Bale chuan San-tiago Bernabeu-ah kum 2022 thleng cham turin contract thar a ziak a, a hlawh zat tur hi kar khat-ah £600,000 niin chhiah chawi ngai a chawi hnuah £350,000-a ni ang.

Wales captain hian kum 2013 khan a hunlaia khawvel player manto ber ni turin Real hi Tottenham Hotspur aṭangin pound maktaduai 85-in a zawm a, kum ruk atan contract a ziak. Real hian an player pawi-mawh Luka Modric leh Toni Kroos chu contract thar an lo ziahpui tawh bawk.

Kum 27-a upa Bale hian Spanish club-ah season thum hun hmang tawhin vawi 135 a inlan tawhah goal 62 a khung sak a, nomawi panga chawi tawhin heng zinga pahnih hi Champions League a ni.

Real tana a season hmasa berah Champions League final khel nghalin Atletico Madrid an hnehna inkhelah goal a khung a, hemi hma hian Spanish Cup nomawi an chawi theih nan Barcelona lakah goal ropui a khung bawk.

Season hnihnaah erawh hliam vangin Bale a talbuai a, mah se manager thar Zinedine Zidane hnuaia harhtharna a chan hnuah Ballon d'Or dawng thei tura hming chhawp chhuah 30 zingah a tel leh tawh.