Blues tan Hazard leh Costa an inlar
Tun hnaia khel ṭha Southampton khelmuala lenglut Chelsea-in hnehna chang turin harsatna an tawk lo - mikhual tlangnel hian Eden Hazard leh Diego Costa goal khung hmangin Saints hi 2-0 in an hneh.
Blues tan minute rukna lekah Eden Hazard chuan Saints defending chhiat zarzoin keeper Fraser Forster kap karah an goal hmahruai a khung - league match thum chhung a zawna goal a khung hmasak ber a ni. Southampton-in ball chan tam chhunzawm mah se Chelsea tlarhnung inrem fuh an paltlang thei lo a, Hazard leh Costa ten an hun ṭha neih an chhawr thei bik lo bawk.
Second half-ah erawh Costa-a'n theihna a nei a ni tih pholangin yard 22 vela hla aṭangin goal mawi bik a khung a, Saints an tho leh tawh lo. Antonio Conte enkawl Chelsea hian league match li chhung chu a zawnin hnehna an chang ta a, hetianga an tih theih hnuhnung ber chu April 2015 daih tawh khan a ni.
Hei le Hazard
Kum 2014-15 Premier League player of the season-a thlan a nih hnu lawkah Hazard-a'n beisei a phak lo a, season hmasa league-a a goal khung zat chu pali chauh niin Belgian winger hian a thiamna leh theihna a hloh em ni aw tih mai tur khawpin a khel.
Tun season-ah erawh Hazard chanchin ziah danglamin a awm ta. Kum 25-a upa winger hian tun season-a league match sawm a khelhah goal nga a khung leh der tawh. Saints lakah pawh a thiamna leh tharum ngahna kha a la ngai reng tih a lang a, goal a khung bakah Costa pet goal hi a siamsak a ni bawk.
Chelsea tak tak?
Liverpool leh Arsenal tlarhma lamin Blues tlarhnung ṭhiata league match hmasa lama hnehna an chan hnuah Antonio Conte-a'n Italy lama a hlawhtlinpui 3-4-3 formation hmangin Chelsea a remkhawm a, a chesual lo - London derby a Gunners an hneh loh hnuah match li chhung goal an chhuah lo tawh a, goal 11 an khung tawh bawk.
Chelsea boss Antonio Conte chuan, "Team ṭha tak lakah fiahna kan hmachhawn dawn tih kan hre lawk a, hetiang ang game harsaa hnehna chan hi a pawimawh a ni. Chance tam tak kan insiam a, ka tlarhma ten goal an khung laia tlarhnung lam a phui ṭhat bawk avangin ka tan chuan game duhthusam a ni. Ka player ten hnehna chan hi an phu a, training-na lamah an thawkrim em em a ni," tiin a player-te a fak.
Everton an harh
Match nga chhung zet chak hmel hmu loa an awm hnuah Everton-in chak nawmzia an tem ve leh ta a, an mikhual West Ham chu 2-0 in an hneh. Merseyside club tan hian Romelu Lukaku chuan minute 50-naah hnai set sawt aṭangin a tauh lut a, tun hnaiah beisei a phak loh avanga sawisel tawk Ross Barkley chuan khelmualah amah sawiseltute chhanlet nan goal khat a thawh ve bawk.