Mizoram Badminton League hun a thleng ta
Hrangbana Memorial 2nd Mizoram Badminton League chu vawiin tlai dar 4:00 hian Electric YMA Hall-ah khelh ṭan a ni dawn. Match hmasa berah Aizawl khaw pawn team awmchhun Champhai Smashers leh Tuikual Shuttlers ten an khel dawn a, zan dar 7:00-ah team thar Edenthar Shuttlers-in MBL1-a pahnihna Saron Jeremy's Smashers an hmachhawn ang.
Nizan khan Lal Thanhawla Audi-torium-ah MBL2 khuhhawna hun hman a ni a, Mizoram Badminton Association an inpeih tawh tih a chiang. Inkhel hi a hmuna en duh tan chuan Rs 10 man chauh a ni. A hmuna en thei loh tan match zawng zawng hi live a ni dawn bawk. Vawiin tlai dar 4:00-a inkhel tur hi Zonet Zawlbuk-ah live a pekchhuah a a ni ang a, zan dar 7:00-a inkhel hi Zonet Rihnim-ah tihchhuah a ni thung ang.
A ruh no ber chhuah
Mizoram chhunga badminton inelna sang ber MBL-ah team panga Saron Veng Jeremy's Smashers, Mission Veng, Tuikual Shuttlers, Edenthar Shuttlers leh Champhai Smashers te an awm.
Team panga hi vawi khat ṭheuh an inkhel kual ang a, point hmu hniam ber an tla ang. Team pali dangin knockout stage an lut ang a, semifinal hi November 8 leh 9 a khelh tur niin final hi November 11 a khelh tur a ni.
MBL-ah hian match khatah men's singles pahnih, men's doubles, mixed doubles leh 35+ doubles hmangin inelna neih a ni ang a, inelna pakhata chak zawk hian point khat zel an hmu ang. Men's singles-a chak leh 35+ doubles a chak hi a hlut dan a inang reng a, match pakhatah team pakhatin point nga a hmuh theih rualin point a hmu loh theih tihna a ni.
Champhai Vs Tuikual
MBL match hmasa berah Badminton Association of India (BAI) senior ranking-a pathumna ni pha Neeraj Vashisth a inlan nghal dawn. Haryana shuttler hi Tuikual tan a inlan dawn a, Champhai lamin BAI ranking number 7 Siddharath Manoj Thakur leh Mizoram number 2 Lalmuanawma te an theh chhuak thei thung ang.
Champhai hian mixed doubles khel turin Ponty Lalramtluangi an nei a, singles player ṭha Muanawma hi doubles player ṭha a nih tho avangin Ponty kawppui emaw 35+ doubles khel turin a hman theih ang. Aizawl khaw pawn team hian doubles khel thei Zodinmawia leh junior player ṭha Malsawmsanga te an pawimawh rin a ni.
Tuikual lam tan singles khel thei Lalduh-awma, Lalawmpuia leh Zonun-tluanga te an kawl a, heng player pathum hi doubles khel turin an rintlak vek bawk. Hmeichhe player an kawl Lalrinzuali hi Mizoram number 1 a ni a, mixed doubles-ah beiseina an neih san phah ang.
Edenthar Vs Saron Veng
Saron Jeremy's Smashers lak thar Da-niel S. Farid-a'n MBL1-ah hneh loh a tawng lo a, player of the league-ah thlan a ni. Karnataka shuttler hi Edenthar tana singles khel thei tur Samuel Lalnunmawia, Zarzokima, Vanlaltluanga, Lalhmingsanga Eddie Lalfelkima leh Zothansanga tan tum a châkawm loh ang.
Amaherawhchu player pakhat chauh ṭhat a tawk lo a, Edenthar lamin mixed doubles khel turin hmeichhe singles number 2 leh mixed-a number 1 F. Van-lalhriatpuii an kawl avangin MBL team thar hian nikuma pahnihna Saron Veng hi an hneh thei tih a chiang khawp ang.
Fixtures
Zanin Inkhel Tur
4:00 PM Champhai Smashers Vs Tuikual Shuttlers
7:00 Pm Edenthar Shuttlers Vs Saron Veng Jeremy's Smashers
November 2, Nilaini
8:00 PM Mission Veng Vs Champhai Smashers
November 3, Ningani
4:00 PM Saron Veng Jeremy's Smashers Vs Mission Veng
7:00 PM Tuikual Shuttlers Vs Edenthar Shuttlers
November 4, Zirtawpni
4:00 PM Champhai Smashers Vs Mission Veng
7:00 PM Edenthar Shuttlers Vs Tuikual Shuttlers
November 5, Inrinni
8:00 PM Champhai Smashers Vs Saron Veng Jeremy's Smashers
November 7, ThawhṬanni
4:00 PM Tuikual Shuttlers Vs Saron Veng Jeremy's Smashers
7:00 PM Mission Veng Vs Edenthar Shuttlers