Murray-a'n Djokovic a hnaih zel

World number 1 inchuh boruak a sang chho zel a, Andy Murray chuan Jo-Wilfried Tsonga hneha Erste Bank Open nomawi a chawi hnuah Novak Djokovic a hnaih zel.

Vienna-a final khelhah Britain tlangval Murray hian French star Tsonga lakah hian darkar khat leh minute 48 chhungin 6-3, 7-6 (8-6) in hnehna a chang. Kumin June thla a khelh zawh tak French Open-a a chak loh hnuah Murray hian vawi thum chiah chak loh a la nei a, tun hnaiah Beijing leh Shanghai-ah te a champion bawk.

Barclays ATP World Tour Finals khelh hmain Paris Masters khelh hmabak an la nei a, he hunah hian Murray hi a champion leh a, a elpui Djokovic-a'n final a lut lo a nih chuan world number 1 thar kan hmu ang. Paris-ah hian Djokovic hian semifinal lut phak lo se, Murray hian final a lut phak a nih chuan world number 1 a ni tho ang.

Kum 29-a upa Murray chuan, "Ka tum ram panin muangchangin ka kal zel a, tunah chuan ka hnaih ve tawh hle. Kei chuan eng tiang chiahin nge hnehna ka chan tih aiin eng tianga hlu nge a nih hi ka ngaipawimawh zawk ṭhin. Kuminah tournament pasarih-a ka hlawhtlinna chiah a ni a, ka tan chuan a hluin a ropui hle," tiin a sawi.

Serbian tlangval Djokovic hian chawlh-kar 122 chhung zet chu world number 1 dinhmun a luah tawh. Mahse, Grand Slam hnuhnung pahnih Wimbledon leh US Open-ah beisei a phak lo a, Rio Olympic-ah a hlawhtling lo bawk - a dinhmun humhim tur chuan Paris-ah a chet ṭhat a ṭul tawh.

Britain number 1 Murray hi tun hmain ATP number 1 dinhmun hi a la luah ngai lo a, Djokovic lehpela pakhatna a ni thei a nih chuan kum 1974-a Australian John Newcombe (30) hnua world number 1 ni thar thei upa ber a ni ang.