Spain tana kir beisei Villa

New York City captain David Villa chuan an ram Spain-in an squad-ah an ko kir leh a nih chuan a tan duhthusam thleng dik a nih tur thu a sawi. Spain tan vawi 97 inlana goal 59 khung thei striker hian kum 2014 World Cup Brazil-a khelh zawh a nih hnuah ram tan a inlan leh tawh lo a, tun hnai khan Spain coach thar Julen Lopetegui chuan Barcelona striker hlui hi koh kir a rilruk thu a sawi a ni.

Kum 34-a upa Villa hi FIFA World Cup 2010 leh Euro 2008-a Spain an champion
ṭum khan an player pawimawh pawl a ni a, La Liga club langsar Valencia, Barcelona leh Atletico Madrid tan pawha lo khel tawhin kum 2015 khan New York City a zawm a, MLS club tan hian tun season-ah league match 33 khela goal 23 a khung avangin Spain coach Lopetegui ngaihtuahna a luah niin a lang.