Goa mualah Delhi an chak

Pathianni zan Indian Super League inkhelah goal lut lawk lo mah se FC Goa khelmualah Delhi Dynamos chuan minute 70 hnu lama an goal hnih khung hmangin 2-0 in hnehna an chang. Fatorda Stadium, Goa-a mipui 18,000 pungkhawm hmaah team pahnihin goal an khung theih lawk loh avangin goal lut loin chawlhlawk hman a ni.

Mahse, Delhi coach Gianluca Zambrotta-a'n second half-ah substitution a siam fuh a, minute 60-naa tlan lut Marcelinho chuan khelmualah minute 12 chiah hun a hmang hman tihin Delhi tan goal hmahruai a khung nghal a, Richard Gadze goal tur a siamsak bawk.

Delhi Dynamos coach Gianluca Zambrotta chuan, "Marcelinho hi kan tan chuan player pawimawh tak a ni a, tun hnaiah hliam a neih avangin duh angin ka chhawr ngam lo a, danglamna a thlen ta tho a ni," tiin inkhel thlak danglamtu Brazilian forward a fak.