Champion tum BVT-ah Samson & 3? Chanmari FC-ah foreigner pahnih kan hmu dawn em?
Tualchhung football transfer chu nizan zanlai dar 12:00 khan a tawp a, hriat theih chinah Mizoram Premier League hmahruaitu ni mek Bethlehem Vengthlang FC an che na hle - Shillong Lajong captain hlui Samson Ramengmawia leh player dang pathum an ziak lut.
Chanmari FC-in Ivorian striker Leonce Dodoz leh Nigerian defender Umunnakwe Ugochukwu Godswill an ziaklut a; Kolkata lama hming chher tawh Dodoz-a document a la fel lo a, loan-a lakluh an tum avangin transfer hunin a dâl lo ang.
BVT ṭha zawk
Lalbiaksanga Colney hoten I League-a tawnhriat ngah Samson Ramengmawia an lalut a, veteran midfielder hian Zo United tan coach leh player hna a chelh kawp tawh avangin MPL a hrechiang khawp ang.
Tawnhriat nei ṭha Samson-a hi BVT tan ṭhatpui tham a ni a, BS-a Colney hote hian Zo United aṭanga Laldinliana Varte an lakchhuah theih bawk avangin an goal nawr a na sawt ang.
Defender pathum B. Zothanmawia, Lalhruaitluanga leh Joseph Lalsanglura te an lalut bawk a, squad chhah tia sawi theih an ni ve ta. Joseph hi MPL4-ah khan BVT tan inlan tawhin AIFF Academy-ah a awm mek a; nizan lam khan player lakluh belh tur an la buaipui cheu bawk.
CFC-ah foreigner
Transfer tawp niah MPL final hnuhnung pahniha inhmachhawn tawh Chanmari FC leh Aizawl FC-te chet dan a inang lo. I League club Aizawl FC-in October transfer-ah C. Lallawmzuala chiah an lakluh laiin an elpui Chanmari FC-in foreigner pahnih ngawt an ziak lut.
Chanmari FC lakluh tur Dodoz-a'n Mizoram a rawn thleng thei a nih chuan Lalsangzuala Hmar hote goal nawr a na sawt dawn. Mohammedan forward hlui Dodoz hian Ivorian top tier club JC Abidjan tan a khel tawh a, Nepal league-ah Friends Club a champion pui tawh bakah Vietnam football inelna sang V- League thlengin hming a chher tawh. Ani hi loan-a lakluh an tum a, loan hi chu season tluana hman theih a ni a, a document lam a fel hun hunah Chanmari FC a zawm ang.
Chanmari defender thar Nigerian defender Umunnakwe Ugochukwu Godswill erawh a document a fel tawh a, dan anga ziah luh a ni tawh - foreigner pahnih hian Mizoram an la chuang kai lo ve ve.
Zo United-ah Boihpuia
Zo United hi coach thar Remlalthla-muanpuia (Sabito) hnuaia match hnih khelhah an la chak lo ve ve a, goal khungah harsatna an nei bawk. Round 10-ah erawh Zo United hi an dang tawh mai thei, Pailan Arrows, Rangdajied United baka Chennai club tana khel tawh T. Lalnunpuia (Boihpuia) an lalut.
Khawzawl tlangval Boihpuia hi MPL-ah BVT tan pawh a lo khel tawh a, theihna a nei tih finfiah a ni tawh.
Coach Sabito-a'n match hnuhnung bera Chanmari FC an khelh ṭuma a sawi angin goalkeeper H. Lalrinkima an lalut a, squad tihchak nan player pahnih dang an la bawk.
Club dangte chu
Chhinga Veng erawh transfer tawp niah thawm nei lian lo mah se an lak tawhte an hraw avangin relegation chauh thlir loin semifinal an en leh ṭan tawh - beiseina an nei thar a, an phur thar.
Dinthar FC-in transfer tawp niah MPL1 an champion ṭuma player pawimawh Khawzawl defender B. Lalchhanchhuaha an ziak lut a, kum tam deuh tawh mah se midangte fuihtu ṭha tak a ni thei a, mamawh hunah chuan a lak tlak ang.
MPL kaithar Ramhlun North-in Santosh Trophy-a best player ni tawh Services forward Ramniengmawia an ziak lut a, an chhawr thei a nih chuan an ṭhatpui ang. Shillong club Nangkiew Irat aṭanga an lakluh defender H. Lalduhawma document an tifel bawk.
MPL5-a pathumnaa awm mek Chanmari West hian player lian an lakluh belh lo a, thilmak a ni lo - Laldampuia, R. Laldanmawia leh Lalmuanzuala te an khelṭhat tluan chuan a vawi khatna atan MPL nomawi chawi thut thei an ni.
Transfer boruak hi hriat theih chin chauh a ni a, zan lamah thil thleng la awm leh thei a ni. Tuna transfer awmchin ringawt pawh hi MPL5 tingaihnawm tham a ni tawh a, Mizorama football league sang ber hian tun hma zawng aia ngaihven a hlawh sawt a nih pawhin a mak lo ang.
Loan hmangin season tluanin player pali lakluh theih a ni bawk a, a la ngaihnawm dawn chauh niin a lang.
Transfer tawp ni
Player lalut lo - Aizawl FC, Chhinga Veng FC
Bethlehem VT
1. Samson Ramengmawia, midfielder
2. Laldinliana Varte, winger
3. Lalhruaitluanga, defender
4. Joseph Lalsanglura, defender
Chanmari FC
1. Leonce Dodoz, forward*
2. Umunnakwe Ugochukwu Godswill, defender
*Document tih fel a la ni lo.
Chanmari West FC
1. Lalhmangaihzuala, right winger
Dinthar FC
1. Freddy R. Zothanpuia, goalkeeper
2. B. Lalchhanchhuaha, defender
Ramhlun North FC
1. Ramniengmawia, forward
2. H. Lalduhawma, defender
Zo United
1. T. Lalnunpuia, forward
2. H. Lalrinkima, goalkeeper
3. Alan Lalruatfela, winger
4. Lalngaihawma, midfielder