Pakistan hnehtu India an champion

Pathianni zan khan 2016 Asian Men's Hockey Cham-pions Trophy chu khelh zawh niin India chuan Pakistan 3-2 a hnehin a vawi hnih nan champion nomawi an chawi.

Wisma Belia Hockey Stadium, Malaysia-a inkhelah India tan hian Rupinder Pal Singh (18'), Yousuf Affan (23') leh Nikkin Thimmaiah (51') ten goal an khung a, Pakistan goal hnih hi Muhammad Aleem Bilal leh Ali Shan te khung a ni thung.

Asian Men's Hockey Champions Trophy hi a vawi lina niin kuminah hian India, Japan, South Korea, Malaysia, Pakistan leh China te an inel. Ram parukte hi vawi khat ṭheuh an inkhelh kual hnuah a sang paliin semifinal an lut chho a ni.

World number 6 India hian group match-ah hneh loh an tawng lo a, vawi li hnehna changin South Korea nen an inhnehtawk. Semifinal-ah South Korea nen bawk inhmachhawn lehin hun pangngaiah 2-2 a an inhnehtawk hnuin tiebreak-ah 5-4 a hnehna changin an tlang. India hian kum 2011 khan Pakistan bawk hnehin champion nomawi hi an lo chawi tawh bawk.