India ram football season a tawp Mohun Bagan an champion
AIFF Executive Committee chuan League Committee rawtna an pawm a, 2019-20 season chu tuna an khelh chin ang hian a tawp dawn. I League khelh zawh a ni lo a, pakhatna ni lai Mohun Bagan erawh champion atan an pawm.
AIFF hnuaia League Committee chuan April 18 khan season kal lai chungchang video conferencing hmangin an ngaihtuah a, heta an rawtna siam chu India rama football thuneitu sang ber hian a pawmsak.
Thil awm dan
League committee deputy chairman Lalnghinglova Hmar chuan, "Tuna mi hi chu pawmpuina a nih rualin a nemnghehna ang a ni tawh zawk a. AIFF League Committee kha video conferencing in kan ṭhu khawm a, AIFF Executive Committee Member-te hi kha thutlukna kha mail-in min thawn chhuak vek a, kan lo zir chiang a, kan pawmpuina kan thawn leh ta a ni," tiin thil awm dan a sawifiah.
Football hmalam hun pawimawh chungchang sawinaah hian League Committee chairman Subrata Dutta, AIFF general secretary Kushal Das, League CEO Sunando Dhar, League deputy chairman Lalnghinglova Hmar bakah Souter Vaz, Anil Kumar, BK Roka, Chirag Tanna leh Rochak Langer te an tel.
Meeting-ah hian sawm bik Swati Kothari, GM (Strategy & Operations and International Relations) pawh a tel. League Committee thurel hi AIFF Executive Committee hnenah an thlen a, India rama football thuneitu sang ber hian a nemnghet ta a ni.
Bagan an champion ta
I League-ah Mohun Bagan-in match 16 khelhah point 39 hmuin an hnuai chiaha awm East Bengal-in an umpha thei tawh lo a, champion tawhah an inngai. Amaherawhchu, season khelh zawh a la nih miau loh avangin an dinhmun a chiang lo a, AIFF-in League Committee rawtna an pawmpui takah chuan Kolkata club hi an champion ta.
Chutihrualin inelna a zawh a nih miau loh avangin mimal lawmman erawh a awm dawn lo. Inelna neih tawh chin aṭanga pet goal tam ber chu Aser Pierrick Dipanda a ni a, Punjab FC striker hian goal 12 a khung hman.
Goal khung thei zingah Mizo hming a langsar a, Aizawl FC forward Rochharzela'n goal ruk khungin Indian player zinga goal khung tam ber niin Churchill Brothers striker Lalkhawpuimawa'n goal nga khungin Chhara hnuai chiahah a awm ve bawk.
Mizo club tan chanchin lawmawm a awm - Aizawl FC hian match 15 khelhah point 16 an hmu a, an hnuaiah relegate thei lo Indian Arrows chauh an awm. Relegate thei dinhmuna ding Aizawl FC an relegate dawn lo a, champion Bagan tih lo zawng club 10-in pawisa dawn tur chu a zata an insem dawn avangin Mizo club leh pahnihna East Bengal pawisa dawn zat a inang ang.
AIFF thu pawm chu
AIFF chuan League Committee rawtna an pawm a, an thu pawm chu a hnuaia tarlan ang hi a ni.
1. 2019-20 season chu tuna an khelh chin ang hian a tawp dawn.
2. Hero I League chu March 14, 2020 aṭangin tihtawp a ni a, season tawp lo mah se pakhatna dinhmun hauhtu Mohun Bagan chu champion an ni a. Kolkata club hian match 16 aṭangin point 39 an hmuh tawh avangin club dangin an umpha thei tawh lo.
3. I League-ah hian champion pawisa dawn tur tiam loin pawisa semchhuah tur dang zawng chu club 10 ten an inzat ṭheuhin an insem ang.
4. Hero I-League 2019-20 season-ah relegate awm dawn lo a, mimal lawmman a awm dawn lo.
5. Hero 2nd Division chungchangah AIFF Executive Committee chuan Asian Football Confederation an be rawn ang a, Hero I-League 2020-21 khel tur zawnna hi inelna ṭan theih hunah rei lo zawka khel turin ruahmanna siam a ni.
6. AIFF hnuaia kum bithliah inelnaa Hero Sub-Junior League, Hero Junior League, Hero Elite League, leh U-17 Khelo India Girls League te chu tihtawp a ni a, 2020-21-ah a thara khelh leh tur a ni.
7. AIFF Academy Accreditation lehkha pawimawh thehluh hun pawhsei a ni a, lockdown tawp hunah thehluh chhunzawm theih a ni ang.