Premier League club bihchianna Aston Villa legend Gareth Barry a tlo

Premier League awm hnuah erawh Aston Villa an ropui tawh lo a, chutihrualin Villa kawr ha tawh zingah Gareth Barry erawh a daihrei avangin record a nei ṭha hle. Kum 39 mi Barry hian Premier League-ah vawi 653 inlanin match khel tam ber a ni a, amah hnaih bertu Ryan Giggs pawhin match 632 chauh a khelh avangin a record hi kum tam fe a la him ang.

Gareth Barry hi February 23, 1981 khan Hastings, England-ah a piang a, kum 10 mi a nihin Brighton & Hove Albion-ah football zir turin a inziaklut. Kum 16 a nihin Aston Villa a zawm a, heta ṭang hian Barry hi khawvelin a hre ṭan. Villa hian Barry bakah Michael Standing an lalut a, Brighton lamin player pahnih manah hian pound maktaduai 2.5 an phut. 

Football Association inrawlh hnuah inremna an nei thei chauh a, Villa-ah hian Barry hi kum 12 chhung awmin Premier League-ah match 365 a khelhsak a, club history hrim hrimah khelh tam lamah pariatna a ni pha. Standing erawh Villa tan vawi khatmah a inlan ta lo a, club tenau zawkah kal kualin kum 2012 khan football khelh a chawlhsan.

Barry hian amah ruala Villa pantu Standing nen hian an inkawmngeih a, kum 2009 khan a agent Alex Black nen an inṭhen hnuah Standing hi agent atan a hmang zui. English midfielder hian naupan laia a ngaihzawn  Louise chu kum 2007 khan nupuiah a nei a ni.

Barry hian May 2, 1998 khan Villa tana a match hmasa ber a khel a, minute 49-naah Ian Taylor thlakin Sheffield Wednesday 3-1 in an hneh. April 24, 1999-ah Villa leh Nottingham Forest an inkhelh ṭumin Dion Dublin chu inhliam vangin a khel chhunzawm thei lo a, second half-ah Barry hi lutin minute 12 hnuah professional match-a a goal hmasa ber a khung.

Barry hi midfield laia khel ṭhina hriat a ni a, hemi hma hian left back leh left midfield-ah chhawr a ni ṭhin. Aston Villa chanchinah Barry hian hmun pawimawh a chang a, captain armband hreng chhoin kum 26 leh ni 247 mi lek a nihin Premier League-ah match 300 a khel tawh. 

Villa tan Barry hi Premier League-a inlan hnem ber (365) a ni a, assist nei ngah ber (41) a ni bakah club chakpui tam ber (130) a ni bawk. Goal khung tam lamah pawh Barry hi parukna a ni pha a, a tluk loh mi panga Gabriel Agbonlahor, Dwight Yorke, Dion Dublin, Juan Pablo Angel leh Christian Benteke te hi striker vek an ni. 

Barry khelh danin Liverpool manager Rafael Benitez mit a tlung a, May 2008 khan lak tumin Villa an dawr. Chona thar hmachhawn duh Barry-a'n manager Martin O'Neill a sawisel a, Reds hian pound maktaduai 15-in thehchhuak mah se Villa-in a chhuah an phal lo.

Hemi boruakah hian Barry-a'n a lungawi lohna a lantir avangin an hrem hial a, captain nihna an hlihsak. Kum 2009-ah erawh Barry hian pound maktaduai 12-in Manchester City a zawm ta tho a, Premier League leh FA Cup nomawi a chawi pui. City aṭangin Barry hian Everton a pan ve leh a, 2015–16 khan Everton Player of the Season leh Players' Player of the Season-ah thlan a ni.

Barry hian football khelh a la chawlhsan lo a, kum 2017 khan West Bromwich Albion zawmin Championship club-ah hian tun thlengin a la khel. English midfielder hian tun season-ah match ngaah a inlan a, kum 39 mi a ni tawh avangin football khelh a chawlhsan hnaiah a ngaih theih.