Sporting Lisbon tana khel phak lo Chhetri Ka ṭha tawk lo tih min hrilh - Chhetri

Kum 2012 khan Chhetri hian Portuguese club ṭha hi kum thum chhung atana contract ziakin a zawm a, mahse thla kua bak hun a hmang hman lo. 

Chhetri chuan, "Kar khat chauh hun ka hmang hman tih khan head coach chuan Lisbon tana ka ṭhat tawk loh thu min hrilh a, B team tana khel turin min ti a ni," a ti. 

Kum 2012-a Chhetri-a'n Lisbon a pan khan India tan vawi 50 chuang a inlan tawh a, goal 30 a khung tling tawh bawk. Hetihlaia Indian club ṭha Mohun Bagan,  East Bengal, Dempo leh Chirag United tan a khel vek tawh a, Portuguese club a pan hian beiseina sang tak a nei. 

Chhetri hian kum thum chhung atan contract a ziak a, lei duh an awm a nih chuan euro maktaduai li bawr vela a chhuah theih tur thu an ziak tel bawk. Indian football fan-ten beiseina sang tak an nei a, Chhetri pawhin Europe-a hming chher a tum. 

Mahse, kar khat chhung first team-a training a neih ve tlauh tlauh hnuah hetihlaia Sporting coach, Belgium international hlui Franky Vercauteren chuan, "Ka team tana inlan turin i ṭha tawk lo, B team lamah rang takin kal rawh," tiin Chhetri hi a hrilh. 

B team lamah Chhetri a insuan a, Portuguese second division khel turin a inbuatsaih ta zawk - mahse thla kua chhungin match nga chiah a khel ve a, goal a khung miah lo!

Belgian club ṭha Anderlecht leh Belgium hial lo enkawl tawhtu Vercauteren-a'n a team tana khel turin Chhetri a ring tawk lo a, player a nih laia 'The Little Prince' tih hiala hming lem an lo pek Vercauteren hi dem ngawt theih a ni lo. 

Anderlecht tana a khelh laiin league nomawi, UEFA Cup Winners' Cup, UEFA Cup leh European Super Cup nomawi thlengin a lo chawi tawh a, manager a nih hnuah hlawhtlinna tam tak a chhar belh a, European top flight football-a khel tlak leh tlak loh hre hrang tur khawpin tawnhriat a nei ṭha tawk.

Hei mai hi a ni lo - hetihlaia tlarhmaa duhthlan tur a neihte hi an hrawl hlawm hle. Peru international Andre Carrillo, Argentine striker Valentin Viola, Dutch striker 'hot' zet Ricky van Wolfswinkel leh hetihlaia Portuguese forward ṭhangduang Bruma-te an ni. 

Chhetri chuan, "Sporting Lisbon game kha a rang em em a, coach khan a sawi dik chiah a ni. Indian league nena khaikhin chi a ni lo. Thla kua hnuah chhuah ka dil a, ka chungah an ṭha em em a ni," a ti. 

Chhetri hian Sporting Lisbon tana a khelh hma hian Major League Soccer club Kansas City Wizards a lo zawm tawh a, khawvela league ṭhangduang ber pawlah pawh hian a beisei angin hmun a chang lo. 

Indian striker hian March 2010 khan Kansas City hi a zawm a, mahse pre-season ah match sarih khela goal 14 a khung chungin MLS match pakhatmah a khel lo - mid-season friendly-a Manchester United hmachhawn zingah a tel thung. 

Chhetri chuan, "Match sariha goal 14 ka khung kha chun bul ṭan turah ka inbeisei a, mahse ka beisei angin thil a kal lo. 4-2-3-1 formation hmangin kan khel ṭhin a, Kei Kamara kha African striker palian tak a nih avangin ka aiin an thlang zawk zel a ni," a ti. 

Kamara hi kum 2015 khan MLS All-Star leh MLS Best XI-ah a lang. Chhetri hian cup competition-ah match khat a khel tih loh chu Kansas tan official match dang a khel lo a, February 2011 khan US club a chhuahsan thu hi an puang. 

Chhetri hi ram pawn lam club nen vawi tam sawi zawm an lo ni ve tawh a, chung zinga langsar pawl chu Queens Park Rangers an ni - kum 2009 khan English club tan hian kum thum atan contract a ziak a, mahse FIFA ranking-a India dinhmun a hniam avangin Football Association chuan Championship club tana khel turin work permit an pe duh lo. 

Scottish club lian Celtic chuan scout tirin Chhetri a inkhel hi an lo en tawh bawk a, A League club ṭha Perth Glory nen an sawizawm bawk - kum 2011 khan Mizo tlangval Jeje Lalpekhlua nen Rangers-ah trial an nei bawk. 

Mahse, MLS leh Primeira Liga lama beisei a phak loh hnuin Chhetri hian ram pawn club tan a khel leh ta lo a, tunah chuan Bengaluru FC tan 'legend' tih phu khawpin a hming a chher ta zawk. 

Chhetri chuan, "Ka thawhrimna avanga hriatreng hlawh hi ka duh a ni. Kei aia ṭha zawk striker a rawn chhuah hunah chuan ka tha a zuai tak avang ni lo se ka duh a, kei aia thiam zawk a nih avanga min luahlantu ni se ka duh a ni," a ti. 

Kum 2002 khan Chhetri hian a professional contract hmasa ber Mohun Bagan-ah a ziak a, hetihlaia Bagan player-te chu Jose Ramirez Barreto, Bhaichung Bhutia leh Renedy Singh tih vel an ni a, Chhetri tan chuan a sang lutuk!

Chhetri chuan, "Pawl 12 exam result ka hriat hnu lawkah Bagan-in min bia a, Durand Cup-a City Club (Delhi) tana ka khel kha min hmu. SAIL Academy-a awm turin min duh emaw ka ti a, Bagan hian an club tana khel tura min biak ka ring ngai lo. 

"Ka trial tih pawh inhre loin an training ka zawm a, kar khat hnuah ka pa be turin min hrilh. Hetihlai hian agent an la awm lo a, kum 17 mi lek ka nih avangin contract ka ziak thei lo bawk. A tukah ka pa nen min ko a, kum thum contract min zawrh ta mai a ni," tiin a career ṭan dan a sawi. 

Chhetri chuan, "Naupangte ka nih aṭangin a thiam pawl ka ni ṭhin a, mahse chu chu awmzia a awm lo. A pawimawh ber chu thawhrim a ni - theihna leh thiamna nei mah ila, thawhrimnain a zui loh chuan hlutna a nei lo a ni," a ti.