MPL5-ah tu nge top scorer ni dawn?
Chanmari West FC captain Laldampuia chuan Mizoram Premier League Season 5-ah goal ruk a khung tawh a, top scorer a ni ang em?
Kawrtethawveng tlangval hnuai chiahah Chanmari FC forward Malsawmfela leh Dinthar FC forward Michael Lalremruata te an awm a, goal thum khung tawh pawh player panga zet an awm.
Goal ngai zat?
Top scorer ni turin goal khung tur zat bituk a awm lo a, goal khung tam ber nih a ṭul. Goal khung zat inang an awm erawh chuan khel tlem zawk thlan tur a ni a, chutih rualin final thleng thei tan chuan khel tam zawk ni chunga goal khung tam zawk nih a awlsam ngei ang.
MPL5 match 36 khelh tawhah goal 81 a lut tawh a, match tina goal 2.25 lut ang a ni. Club pariat ten semifinal leh final chhiar tel loin match nga ṭheuh khelh tur an la nei a, a la goal zel dawn.
Top Scorer ni tawhte
MPL hmasa bera goal khung tam ber chu Chanmari FC forward MS Dawngliana a ni a, tun season-a Chhinga Veng FC tana khel Dawngtea hian goal 10 a khung. Bawngkawn tlangval hi Sialhawk tlangval R. Laldanmawia (9 Goals) leh Republic Veng tlangval F. Lal-rinpuia (8 Goals) ten an pha lo.
MPL2 leh MPL3-ah Mizoram Police winger Lalbiakhlua chu top scorer a ni a, Keifang tlangval hian goal 8 leh goal 9 a khung.
MPL3-ah hian Mal-sawm-fela'n Police winger Biaktea goal khung zat hi khung tho mah se Keifang tlangval hi a khelh tlem zawn avangin top scorer chawimawina hi hlan a ni.
MPL4-ah Aizawl FC forward F. Lalrinpuia'n goal 13 teuhmeuh khungin MPL season khata goal khung tam ber a ni a, Republic Veng tlangval hian MPL season hnuhnung berah hian mimal chawimawina dawn theih top scorer, best forward leh best player a dawng vek.
MPL5-ah chuan
West Warrior captain Dampuia hian eng chen nge a thlen dawn tih a hriat loh a, tun season-a goal ruk a khung hma hian MPL season hnuhnung pathumah goal riat a khung. A tawi zawng chuan Dampuia hi a khelh ṭhat ber season a ni a, top scorer ni tur chuan goal khung zel a la mamawh.
Mizo striker ṭha zinga sawi hmaih theih loh Sawmfela hi top scorer a la ni ngai lo a, kumin hi Ramhlun South tlangval hun a ni dawn em?
Dinthar FC forward Michael Lalremruata hian MPL hmasa pahnih belhkhawma Aizawl FC tana goal sarih a khung hnuin season hnih chhung goal a khung lo. Tun season-ah Khatla tlangval hian MPL-a a khelh ṭhat ber hun a hmang mek.
MPL5-ah club zawng zawng an ṭang chho a, Ramhlun North foreigner Onyeama Francis Okechu-a'n a match hmasa berah goal a khung nghal. Chanmari FC-in Ivorian forward Leonce Dodoz an la dawn bawk, Chu-tih-rualin foreign player ten in-khelh hun chhung an neih tam tawh loh avangin top scorer hi ṭum dang ang thoin Mizo a nih ngei erawh a rinawm thung.
Goal hnih aia tam khung thei player-te
Hming Club Goal
1 Laldampuia Chanmari W FC 6
2 Malsawmfela Chanmari FC 5
3 Michael Lalremruata Dinthar FC 5
4 Lalkhawpuimawia Chhinga Veng FC 3
5 R. Laldanmawia Chanmari W FC 3
6 Lalrammuanpuia (Apuia) Bethlehem VT 3
7 Lalruatpuia Dinthar FC 3
8 Vanlallawma Chhinga Veng FC 3