MPL5 : November 4-ah zan danglam

Lammuala hun hnuhnung hman duhtu Pu Jumbo/Zama (Herbert Winston Vaughan) pualin Mizoram Football Association chuan November 4, 2016 zana Mizoram Premier League inkhelah hun a hmang dawn a, he hunah hian mi zawng zawng tel turin MFA chuan a sawm a ni.

August 2, 1926-a piang British pa Pu Jumbo hian a thih hmain thurochhiah a nei a, chutah chuan, "Ka vanglaia ka hun hmanna hlimawm ber chu Lammual a ni a, Lammualah ngei hian ka pualin thil lo ti rawh u," tiin a hnutchhiah a, Lammuala ti tura a beiseite pawh a sawi lang a ni.

Mizote'n Pu Jumbo tia an koh, a Mizo hminga Zama tia an koh ṭhin Sap pachal Herbert Winston Vaughan hi tun hmain Mizoramah a lo awm tawh a, British sipai niin Lammualah football a khel ve ṭhin. Pu A Thanglura (L) farnu Pi Rokamlovi nen 1945 khan an innei a, British mi Mizo nupuia nei hmasa ber zinga mi a ni. Mizorama a awm chhung hian football a tuipuiin Lammualah ngei pawh vawi duai lo a inkhel a, goalkeeper a ni. Hetih hunlai hian East India-a football goalkeeper ṭha ber pawl nia sawi a ni.

Mizoram a chhuahsan hnuah Sheffield, England-ah 1960 khan a inbengbel a, he hmun aṭang hian Mizoram football hmasawnna hi a la ngaihven reng a, kum 2014-a Santosh Trophy-a Mizoram an champion khan a lawmpui thute pawh a thawn nghe nghe a ni. Amah hi football ngaina tak niin England-ah pawh inkhel en taima tak a ni zui zel a, amah leh a fate bakah a tute thlengin football-ah an tui hle.

Pa vannei tak a ni a, fa 10 a nei a, tu 23 leh tu chhuan 28 a nei a, an zavai hian kum 2015-a an inneih kum 70-na an lawm ṭumin an kal khawm thei vek a, an la dam vek a ni. Jumbo hi kum 89 mi niin January 19, 2016 khan a boral a, a thih hma hian ama puala Lammual ngeia hun hman a duh thu a chhungte hnenah hian a chah a ni.

English football-ah chuan Sheffield United ṭantu ruhkawl a ni a, a thih hnu pawh hian Sheffield United khelmual Bramall Lane-ah a pualin hun an hmang nghe nghe a ni.

Pu Jumbo thih hnuah a chhungten Mizoram Football Association-ah lehkha thawnin an pa berin a thih hmaa a duhthusam tihhlawhtlin an rawn dil a, hei hi MFA chuan zahawm a tiin tihhlawhtlin ngei ni se, tiin a rel. November 4, 2016 zan dar 7:00-a MPL Round 10-a Chanmari West FC leh Aizawl FC inkhelh ṭan hma leh half time laiin Lammual ngainatu leh a a puala hun hman tura ngentu Pu Jumbo pual hian hun remchang siam a ni dawn ta a ni.

He hun hmang tur hian England leh khawvel hmun dang aṭangin Pu Jumbo tu leh fate mi 27 chu Aizawlah an lo zin ang.

- Information & Publicity Committee, MFA