Paris-ah Novak Djokovic a kir dawn

July thla khan Novak Djo-kovic chuan Grand Slam-a a champion kimna ni turin Andy Murray hnehin French Open champion nomawi a chawi. Roland Garros-a a hlawhtlin hnua a vawi khat nan Serbian tlangval hi tunkar chhunga neih tur Paris Masters khel turin France khawpuiah hian a kir.

Tun hnaiah world number 2 Murray a khel ṭha tluang a, a inkhelh hnuhnung 56 aṭanga vawi 52 zet hnehna changin tun season-ah nomawi pasarih a chawi tawh. Season chawhnu lamah Djokovic-a'n beisei a phak loh avangin player pahnihte hian ATP ranking-ah number 1 dinhmun an inchuh chho mek.

Grand Slam vawi 12 cham-pion tawh Djokovic chuan, "Chona hmachhawn tur ka nei hian court chhunga luh min ti chak zual a, point khat hlutzia kan hre chhuak thar lehah pawh a ngaih theih," tiin Murray nena inelnaah a zam lo hle.

Kum 29-a upa Djokovic hian tun hnai kum nga chhung chu vawi li zet world number 1 nichungin season a khar a, Paris-ah hian a champion a nih chuan Murray tan lehpelh theih a ni lo ang.

Djokovic hi Paris Masters-ah hian tun hnaiah vawi li a inlan aṭanga ṭum thum ngawt a champion avangin inrintawkna sang tak nen inelna hi a hma-chhawn ngeiin a rinawm - cham-pion hian ATP ranking-ah point 1,000 an hmuh belh dawn a ni.

Djokovic chuan, "French Open nomawi ka chawi khan inrintawkna min pek belh nasa hle a, tun ṭumah pawh hian clay court-a inkhel turin ka inpeih. Chutihrualin tun hma lama ka la hlawhtlin ngai lohna hmuna hnehna ka chang khan ka rilru tam tak a la peng bawk," a ti.

World number 1 hian tun hnai thla thum chhung vela Murray hnathawh chu ropui leh fak tlak a nih thu a sawi rualin a dinhmun humhim tur chuan a theihtawp a chhuah tur thu a sawi bawk.