FIFA-in 'Best Football Awards' a sem dawn

2nd November, 2016

Ballon d'Or chawimawina dawng thei tur hming chhawp-chhuah a nih hnu lawkah FIFA-in thawm an nei ve lehnghal a, January 9, 2017-ah Best FIFA Football Awards an sem dawn. Zurich khawpuia sem tur FIFA Awards-ah hian chawimawina hrang hrang pariat a awm dawn a, heng zingah hian Best FIFA Men's Player 2016 chu ngaihven hlawh ber a ni.

Ballon d'Or nena danglamna

FIFA hian kum 1991-2009 inkarah khan FIFA World Player of the Year chawimawina an lo sem tawh ṭhin a, hetihlai hian football lam chanchin ziahna chanchinbu lar France Foot-ball chuan Ballon d'Or (European Player of the Year) chawimawina an sem ve ṭhin bawk.

Award pahnih hi ngaihhlut hlawh tak a nih avangin FIFA leh France Football-in thawkdun turin thutlukna an siam a, kum 2009 khan khawvela footballer
ṭha ber thlanna FIFA Ballon d'Or sem ṭan a ni. Kumin aṭangin FIFA leh France Football-in thawhdunna an titawp a, Ballon d'Or-in khawvela footballer ṭha ber thlanna an kalpui chhunzawm zel a, FIFA-in a hranin an kalpui ta bawk.

Sem dan tur

FIFA Ballon d'Or ang lo takin Best FIFA Football Awards-ah chuan fan-ten an duhzawng an thlang thei dawn a, award dawng tur thlang theitu hi hmun hnihah ṭhen an ni. Best Player mipa leh hmeichhia bakah Best Coach mipa leh hmeichhia hi fan-ten an duhzawng thlangin vote an thlak thei ang.

Ruahmanna ang chuan FIFA hnuaia national team captain leh coach te chuan result-ah 50% in nghawng a nei a, online kaltlanga fans leh khawvel hmung hrang hranga journalist thlan bik 200 aia tamte vote chuan 50% in awmzia a nei bawk dawn a ni.

Sem hun

Khawvela footballer ṭha ber thlang tur hian FIFA chuan November 4 khian player hming 23 a chhawp chhuak ang a, heng hming a chhawp chhuah aṭang hian a sang zual pathum thlanchhuah leh tur a ni. December 2-ah Best FIFA Men's Player 2016 ni thei tura vote hmu sang player pathum hming puan zar a ni ang a, nakkum January 9-ah award hi chawimawina dang sem rualin sem a ni ve nghal ang.

Khawvela footballer ṭha ber thlanna hnuhnung ber hi kumin January khan neih a ni a, Barcelona leh Argentina forward Lionel Messi chuan mipa lamah chawimawina dawngin USA-in hmeichhe World Cup nomawi an chawi theih nana player pawimawh midfielder Carli Lloyd chu hmeichhe lamah chawimawina pek a ni thung.

Best FIFA Football Awards semna turte:

Best FIFA Men's Player

Best FIFA Women's Player

Best FIFA Men's Coach

Best FIFA Women's Coach

FIFA Puskas Award (goal of the year)

FIFA Fair Play Award

FIFA Fan Award

FIFA FifPro World11