Moyes a mangang

Premier League mawng phaha awm mek Sunderland manager David Moyes chuan an hun tawn mek chu a manganthlak thu a sawi chhuak.

Moyes a naute hi Inrinni zan khan Arsenal lakah 4-1 in an tlawm a, tun season league match 10 an khelh tawh aṭangin chak ni hmel an la hmu ve lo, point hnih hmuin an chung chiaha awm Swansea City chuan point nga an hmu thung.

Kum 53-a upa Moyes chuan, "Inrinni-a kan result khan min ti lungngai em em a, zanah khan pindan thimah thawm nei loin ka inkhung hial a ni," tiin an hun tawn hrehawm a tih thu a sawi. Team 20 inel zingah Black Cats chiah hi hneh la nei lo awmchhun an ni.

Moyes chuan sawi chhun-zawmin, "Arsenal lakah khan kan khel chhe lo a, chutihrualin point hlawh chhuak tur chuan a la tawk zo lo. Karthar a ni a, rilru tharin beiseina nen inkhelh hmabak thlir kan tum ang - result ṭha kan neih theih tawh ka beisei," a ti.

Sunderland hian In-rinni hian league-a hnehna an channi hmuh beiseiin table-a 10-na Bournemouth an lenchilh ang.